عالمگیر وبا کورونا وائرس نے دنیا بھر میں تباہی مچا کے رکھ دی ہے، ماہرین اس وائرس سے بچاؤ کی ویکسین تیار کرنے کی کوششوں میں ہیں جبکہ آئے دن اس وائرس سے متاثرہ افراد میں کوئی نہ کوئی نئی علامت بھی ظاہر ہو جاتی ہے۔
تفصیلات کے مطابق جنوبی کوریا سے افسوس ناک خبر سامنے آئی تھی جب وہاں کی حکومت نے یہ انکشاف کیا تھا کہ متعدد کورونا کے مریض صحت یاب ہونے کے بعد دوبارہ اس مہلک وائرس سے متاثر ہو چکے ہیں۔
کچھ دن بعد معلوم ہوا کہ یہ صرف جنوبی کوریا میں نہیں بلکہ چین میں بھی ہو رہا ہے۔
آخر ایسا کیوں ہو رہا ہے؟ یہ وہ سوال ہے جس نے ڈاکٹروں کو پریشان کر کے رکھ دیا ہے۔ چین میں کورونا وائرس کی وبا کی رفتار کو سست کرنے میں کامیابی حاصل ہوئی تھی لیکن اب یہ وبا نئے سرے سے حملہ کر رہی ہے۔
حیران کرنے والا پہلو یہ ہے کہ ان مریضوں میں صحت یابی کے بعد تمام ٹیسٹ کے نتائج سے معلوم ہوا تھا کہ وائرس اب جسم میں موجود نہیں مگر اب کئی مہینوں بعد دوبارہ ٹیسٹ کروانے پر پتہ چلا کہ کورونا وائرس موجود ہے، کچھ کیسز میں تو 70 دن بعد ایسا ہورہا ہے، ان میں سے بیشتر کی عمریں 50 سے 60 سال سے زائد ہیں۔
چینی طبی حکام کے مطابق ابھی یہ بات واضح نہیں ہو سکی کہ جن افراد میں وائرس کی دوبارہ تشخیص ہوئی ہے وہ دیگر افراد کو بھی بیمار کر رہے ہیں۔