عالمگیر وبا کورونا سے بچاؤ کے لئے ہر ملک کے باشندے اپنے اپنے طریقے کے مطابق علاج کر رہے ہیں۔
تو وہیں برازیل کے جنگل میں رہنے والے قبائلی کورونا وائرس سے بچنے کے لئے دیسی ٹوٹکوں کے ذریعے علاج کرنے کی کوشش کر رہے ہیں۔
غیرملکی نیوز ایجنسی کی رپورٹ کے مطابق ایمازون قبیلے کے افراد جنگل سے خاص قسم کی جڑی بوٹیاں جمع کر کے اور شہد کی مدد سے کورونا علامات کے خاتمے کی کوششوں میں جٹے ہوئے ہیں جو ان کے روایتی ٹوٹکوں میں شامل ہے۔
رپورٹ کے مطابق قبائلی لوگ وائرس کے علاج کے لئے بارک نامی درخت کے ریشوں اور شہد کی ملاوٹ سے دوا تیار اور استعمال کرتے ہیں اور ان کا یہ ماننا ہے کہ اس دوا سے علاج کر کے مریض صحتیاب ہوجاتے ہیں۔
برازیل میں ایمازون جنگل میں رہنے والے مختلف قسم کے قبائل بھی عالمی وبا سے متاثر ہورہے ہیں، اب تک 20 ہزار کورونا کیسز سامنے آئے جبکہ 1 ہزار کے قریب افراد ہلاک ہوگئے ہیں۔