عالمی وبا کورونا وائرس کے باعث جہاں زندگی کے تمام شعبے متاثر ہوئے ہیں تو وہیں ایک مشکل اور آن پڑی کہ لاک ڈاؤن کے دوران ٹماٹر کی قیمت گرنے کی وجہ سے کسانوں نے سینکڑوں ٹن ٹماٹر سڑک پر پھینک دئے۔
غیر ملکی میڈیا کے مطابق بھارت میں جاری لاک ڈاؤن سے جہاں تمام کاروبار بند ہے تو وہیں ٹماٹروں کی کاشت کرنے والے کسان بھی بری طرح متاثر ہو گئے ہیں۔
لاک ڈاؤن کی صورتحال میں صرف چند ہی ہفتوں کے دوران ٹماٹر کی فصل کی قیمت تیزی سے کم ہوئی، جس کی وجہ سے ٹماٹر اب کوئی کوڑیوں کے دام بھی لینے کو تیار نہیں۔
بھارت اترپردیش کے شہر غازی پور کی منڈی میں ٹماٹر خریدنے والا کوئی گاہک نہیں رہا، منڈی میں ایک روپے کلو ٹماٹر فروخت ہوئے، جس کے باعث کاشت کاروں نے سینکڑوں ٹن ٹماٹر سڑک پر پھینک دئے۔
اس کی وجہ یہ کہ سرحدوں کی بندش سے تجارتی معطلی کے باعث کاشت کار خسارے کا سودا کرنے پر مجبور ہو گئے، وہ اپنی فصلوں کو خود برباد کرنے پر مجبور ہیں۔