پاکستان میں ویڈیو ایپ ٹک ٹاک پر پابندی لگا دی گئی تھی جبکہ اب ٹک ٹاکرز کے لیے خوش آئند خبر یہ سامنے آئی ہے کہ پشاور ہائیکورٹ کی جانب سے ایپ پر سے پابندی ختم کر دی گئی ہے۔
تفصیلات کے مطابق چیف جسٹس پشاور ہائیکورٹ جسٹس قیصر رشید نے ٹک ٹاک پر غیر اخلاقی مواد اپ لوڈ کرنے کے خلاف دائر درخواست پر سماعت کی جس سلسلے میں ڈی جی پی ٹی اے اور درخواست گزار کے وکیل عدالت میں پیش ہوئے۔
عدالت نے ڈی جی پی ٹی اے کو ہدایت کرتے ہوئے کہا کہ آپ لوگوں کے پاس ایسا سسٹم ہونا چاہیے جو اچھے اور برے میں تفریق کرے، پی ٹی اے ایکشن لے گی تو لوگ پھر ایسی ویڈیوز اپ لوڈ نہیں کریں گے۔
بعد ازاں عدالت نے ٹک ٹاک پر عائد پابندی کو ختم کرنے کا حکم دیا اور کہا کہ ٹک ٹاک کھول دیں لیکن غیر اخلاقی ویڈیوز روکنے کے لیے مزید اقدامات کریں۔