کراچی: ایم کیو ایم پاکستان کے کنوینر ڈاکٹر خالد مقبول صدیقی نے کہا ہے کہ ضمنی انتخابات میں حصہ لینے سے متعلق جلد فیصلہ کریں گے۔
کورنگی میں منعقدہ تقریب سے خطاب کرتے ہوئے انہوں نے کہا کہ فوادچودھری کی گرفتاری کی مذمت کرتے ہیں جب کہ پیٹرولیم مصنوعات کی قیمتوں میں اضافے کی مذمت کرچکے ہیں۔
سابق وفاقی وزیر ڈاکٹر خالد مقبول صدیقی نے کہا کہ کراچی میں پولیس والوں کاشکریہ جنہوں نے بلدیاتی الیکشن میں ٹرن آوٹ 13 فیصد کیا، وگرنہ پولیس کردار ادا نہ کرتی توٹرن آوٹ 5 فیصد تھا۔
انہوں نے کہا کہ ہمارے لوگ گھروں میں بیٹھے رہے اوربلدیاتی انتخابات کا بائیکاٹ کیا، الیکشن کمیشن کا کام تنخواہ لینا نہیں بلکہ صاف و شفاف انتخابات کا انعقاد کرانا ہے۔
ایم کیو ایم پاکستان کے کنوینر ڈاکٹر خالد مقبول صدیقی نے کہا کہ بابرغوری واپس آ رہے ہیں، سیاست سے متعلق فیصلہ خود کریں گے۔