لاہور: پنجاب میں بلدیاتی انتخابات نہ کرانے کا اقدام لاہور ہائیکورٹ میں چیلنج کر دیا گیا۔
جماعت اسلامی لاہور کے امیر ضیا الدین انصاری نے پنجاب میں بلدیاتی انتخابات نہ کرانے کے خلاف لاہور ہائیکورٹ میں درخواست دائر کر دی۔ درخواست میں وفاقی حکومت، الیکشن کمیشن سمیت دیگر کو فریق بنایا گیا ہے۔
دائر کردہ درخواست میں مؤقف اختیار کیا گیا ہے کہ پاکستان کے آئین کے مطابق لوکل گورنمنٹ کے انتخابات نہ کرانا احتساب اور لوکل سیل گورننس کی روح کو مجروح کرتا ہے۔
درخواست میں کہا گیا کہ مقامی حکومتوں کے انتخابات کی عدم موجودگی مقامی ذمہ داری کے خاتمے کا باعث بنی ہے۔ بلدیاتی انتخابات کے عدم انعقاد کے باعث انتظامی افراتفری، وسائل کی غلط تقسیم اور رکی ہوئی ترقی جیسے نقصانات ہوئے ہیں۔
یہ بھی پڑھیں: ذخیرہ اندوزی کسی صورت برداشت نہیں کی جائے گی، وزیر اعلیٰ سندھ
مؤقف اختیار کیا گیا کہ بلدیاتی انتخابات کے عدم انعقاد کے باعث جاگیرداروں کا عروج جبکہ کمزور طبقہ مزید کمزور ہو رہا ہے۔
درخواست میں استدعا کی گئی کہ عدالت فریقین کو پنجاب میں 90 دن کے اندر بلدیاتی انتخابات کرانے کی ہدایت کرے۔ اور آئینی فرائض سے غفلت برتنے پر فریقین پر جرمانہ عائد کیا جائے۔