امریکہ اور ایران کے درمیان چلنے والی کشیدگی سے متعلق پاکستان کا امریکہ کے ساتھ ہونے پر، ڈی جی آئی ایس پی آر میجر جنرل آصف غفور کا اہم بیان سامنے آگیا۔
ڈی جی آئی ایس پی آر سے سوال کیا گیا کہ آرمی چیف کا مائیک پومپیو سے رابطہ ہوا ہے، یہ افواہیں بھیلائی جا رہی ہیں کہ پاکستان امریکہ کے ساتھ، ایران کے خلاف جنگ کا حصہ بننے جارہا ہے؟
سوال کے جواب میں ان کا کہنا تھا کہ ایسی بہت سی افواہیں گردش کر رہی ہیں، جب میں سوشل میڈیا دیکھتا ہوں تو بدقسمتی سے اس میں کچھ جانے مانے لوگ بھی بات کر رہے ہوتے ہیں جس پر بے حد افسوس ہوتا ہے جبکہ ٹیلیفونک رابطے کے حوالے سے انہوں نے کہا کہ یہ کوئی پہلی کال نہیں ہے، افغان مصالحتی عمل اور خطے کی سیکیورٹی کو لے کر آرمی چیف کا اہم کردار ہے، اسی تناظر میں بات چیت ہوئی ہے۔ اس پر دفتر خارجہ کا اپنا بیان بھی آیا ہے۔
تاہم عوام اور میڈیا کو مخاطب کرتے ہوئے آصف غفور نے کہا کہ کسی قسم کی افواہ پر یقین نہ کیا جائے۔ صرف با وثوق ذرائع سے موصول ہونے والی خبروں پر ہی یقین کریں۔
یہ ملک دشمن عناصر ہیں جو ہمارے خلاف پروپیگنڈہ کر رہے ہیں۔ اس متعلق ان کا مزید کہنا تھا کہ ان افواہوں کو پھیلانے میں بھارت شامل ہے، ہم نے بہت قربانیوں کے بعد پاکستان میں امن کو یقینی بنایا ہے، خطے میں امن کیلئے بھر پور کردار ادا کریں گے اور اس کے امن کو کوئی نقصان نہیں پہنچنے دیں گے۔