خوراک انسان کی بنیادی ضروریات میں سے ایک ہے۔ غذا کو درست طریقے سے استعمال کرنا انتہائی ضروری ہے ورنہ اس کے منفی اثرات صحت پر مرتب ہوتے ہیں جس سے انسانی جِسم میں مختلف بیماریاں جنم لیتی ہیں۔
ہم میں سے بہت سے افراد ایسے ہیں جو بِنا سوچے سمجھے مختلف سبزیوں اور گوشت کو ان اشیاء کے ساتھ جوڑ لیتے ہیں جِن کا نقصان براہِ راست ہماری صحت پر ہوتا ہے۔
آئیے جانتے ہیں ان غذاؤں کے بارے میں جنہیں مِلا کر کھانا نقصان دہ ہوتا ہے۔
ٹماٹر اور کھیرا
سب سے پہلے ان کی بات کرتے ہیں جو روز مرّہ کے کھانوں میں سب سے زیادہ استعمال ہوتے ہیں۔ ہم بات کر رہے ہیں ٹماٹر اور کھیرے کی جِسے ہم سلاد کے طور پر کھاتے ہیں۔ جدید تحقیق کے مطابق ان دونوں کو ملاکر کھانے سے جسم کے بائیو کیمیکل پاتھ ویز متاثر ہوتے ہیں اور سوزش کا خطرہ بڑھ جاتا ہے۔ ماہرین کا کہنا ہے کہ ٹماٹر اگر کھیرے کے ساتھ ملا کر کھایا جائے تو دونوں سبزیوں کے وٹامنز ڈائجسٹ نہیں ہوپاتے اسی لیے دونوں سبزیوں کو ایک سلاد میں ملانے سے پرہیز کریں۔
پاستا، میکرونی کے ساتھ قیمہ
میکرونی کے ساتھ قیمہ تقریباً ہر گھر میں استعمال کیا جاتا ہے جو کہ بچوں کی پسندیدہ ڈِش بھی ہے۔ ان دونوں کو مِلا کر کبھی نہیں کھانا چاہئیے۔ اس سے معدے میں سلیوری گلائینڈز پاستا کو شوگر میں بدلتے ہیں اور شوگر پروٹین (گوشت) کے ساتھ مل کر ایک نقصان دہ کیمکل پیدا کرتی ہے جو ذیابطیس کا باعث ہوسکتی ہے۔
کیلے کے ساتھ دودھ کا استعمال
ہر گھر میں ہی تقریباً کیلے کا مِلک شیک بنایا جاتا ہے۔ بچے بڑے اسے کافی شوق سے پیتے ہیں لیکن غذائی ماہرین کے مطابق زیادہ میٹھے پھلوں کا دودھ کے ساتھ استعمال معدے پر بھاری ہوتا ہے جسے ہضم کرنا معدے کے لیے مشکل ہوتا ہے۔
آلو کا گوشت کے ساتھ استعمال
یہ سن کر کافی لوگوں کو دکھ ہو گا کہ آلو کا گوشت کے ساتھ استعمال صحت کے لیے مضر ہے کیونکہ ہر گھر میں آلو گوشت کا سالن لازمی بنایا جاتا ہے۔ ڈائیٹ ماہرین کا کہنا ہے کہ یہ غذا معدے کےلیے بہت بھاری ہوتی ہے اور معدہ اس کھانے کو بہت مشکل سے ہضم کرتا ہے تاہم آلو میں اسٹارچ شامل ہوتی ہے جبکہ گوشت میں موجود پروٹین سے تیزابیت پیدا ہوتی ہے اور ان دوںوں کو ملا کر کھانے سے سینے میں جلن، تیزابیت، گیس اور کئی بیماریاں لاحق ہونے کا خدشہ ہوتا ہے۔
کافی اور سینڈوچ
اکثر لوگ صبح جلدی میں ہوتے ہیں کیونکہ ہر کسی کو اپنے دفتر، اسکول یا کالج پہنچنا ہوتا ہے ایسے میں سینڈوچ بنانا بہت آسان لگتا ہے اور اس میں چیز (پنیر) ملایا لیا جائے تو جسم بھرپور غذائیت فراہم کرتا ہے لیکن یاد رکھیے اگر سینڈوچ کے ساتھ آپ کافی پی رہے ہیں تو یہ پنیر کے سارے فوائد ختم کردے گی الٹا نظام ہاضمہ پر بھی برے اثرات ڈالے گی۔