آج کے دور میں سب سے زیادہ استعمال کی جانے والی سماجی رابطے کی ویب سائٹ فیس بک اپنے صارفین کے لئے لا رہی ہے ایک انتہائی کارآمد فیچر جس کے استعمال پر صارفین کو پیسے دیے جائیں گے۔
فیس بک اب اپنے صارفین سے ان کی آواز کی ریکارڈنگز مانگے گا اور اس کے بدلے انہیں پیسے دے گا۔
سال 2019 میں فیس بک نے کہا تھا کہ وہ اب میسنجر ایپ کے ذریعے لوگوں کی آوازیں یعنی وائس نوٹس نہیں سنے گا جس کا مقصد اپنی وائس ریکگنیشن (آواز کی شناخت) کی ٹیکنالوجی کو بہتر بنانا تھا۔
تاہم ٹیکنالوجی ویب سائٹ دی ورج کی ایک رپورٹ کے مطابق فیس بک اپنی ویو پوائنٹس ریسرچ ایپ کے ساتھ پروناؤنسی ایشن نام کا پروجیکٹ شروع کر رہا ہے۔ مذکورہ پروجیکٹ فی الحال صرف امریکا میں شروع کیا گیا ہے اور 18 سال سے زائد عمر کے ایسے افراد جن کے دوستوں کی تعداد 75 یا اس سے زیادہ ہے وہ اس میں حصہ لے سکتے ہیں۔
فیس بک کے مطابق یہ ریکارڈنگز صارفین کی پروفائلز کو خفیہ رکھیں گی اور بغیر صارف کی رضامندی کے انہیں فیس بک کسی بھی جگہ پر شئیر نہیں کرے گا۔