بھارتی فلم انڈسٹری سے تعلق رکھنے والی نامور اداکارہ منیشا کوئرالہ نے بالی ووڈ کی متعدد فلموں میں کام کیا اور لوگوں میں ان کی فلمیں اور گانے بے حد مقبول ہوئے، لیکن ان دنوں وہ سوشل میڈیا پر شدید تنقید کی زد میں ہیں۔
بھارتی اخبار ٹائمز آف انڈیا کے مطابق بالی ووڈ کی معروف اداکارہ منیشا کوئرالہ نے نیپال کے وزیر خارجہ پردیپ گیاولی کی ٹوئٹ پر جواب دیتے ہوئے لکھا کہ وہ امید کرتی ہیں کہ بھارت، نیپال اور چین اپنے سرحدی تنازع کو بہتر طور پر حل کرلیں گے۔
اگرچہ منیشا کوئرالہ نے اپنی ٹوئٹ میں کوئی سیاسی بات نہیں کی تاہم انہوں نے نیپالی وزیر خارجہ کا شکریہ ادا کیا جس پر بھارتی شہری تلملا اٹھے اور انہیں طعنے دینا شروع کردئے اور انہیں ہمیشہ کے لئے بھارت چھوڑ کر جانے کو کہا۔
سابقہ اداکارہ منیشا کوئرالہ کی ٹوئٹ کے بعد بیشتر لوگوں نے انہیں سوشل میڈیا پر قومیت کے طعنے دئے اور کہا کہ اگر انہیں بھارت میں اتنا ہی برا لگ رہا ہے تو وہ یہاں سے نیپال چلی جائیں اور وہاں جاکر پیسے کمائیں۔
واضح رہے کہ منیشا کوئرالہ نیپال کے ایک سیاسی ہندو گھرانے میں پیدا ہوئیں، ان کے والد نیپال کے وزیر رہ چکے ہیں جبکہ ان کے دادا 1950 کی دہائی میں نیپال کے وزیر اعظم رہ چکے ہیں۔