دنیا کے امیر ترین افراد میں سے ایک مائیکرو سافٹ کے بانی بل گیٹس کو ایک بظاہر معمولی اور چھوٹے سے نظر آنے والے جاندار کی دید خوفزدہ کر رہی ہے۔
بل گیٹس دنیا کو یاد دلانا چاہتے ہیں کہ اگرچہ کورونا وائرس کا سایہ ہر جگہ پھیل رہا ہے مگر مچھر آج بھی سب سے زیادہ ہلاکتوں کا باعث بننے والا جاندار ہے۔
17 اگست کو اپنے گیٹس بلاگ میں بل گیٹس نے مچھروں کا ہفتہ منانے کا اعلان کیا جس کے دوران مختلف ویڈیوز اور مضامین کے ذریعے اس کیڑے کی ہلاکت خیزی کو واضح کیا گیا۔
ان کا کہنا تھا کہ ہر رات مچھر لاکھوں افراد کو ملیریا اور ڈینگی سے متاثر کرتے ہیں جو ایسے مرض ہے جس سے ہر دوسرے منٹ میں ایک بچہ ہلاک ہورہا ہے۔
بل گیٹس نے کہا کہ مچھر سماجی دوری کی مشق نہیں کرتے، وہ ماسک بھی نہیں پہنتے، اس وقت جب کووڈ 19 دنیا بھر میں پھیل چکا ہے، تو یاد دہانی ضروری ہے کہ دنیا کا سب سے بڑا قاتل جاندار اس وبا کے دوران آرام نہیں کررہا۔
انہوں نے مزید کہا کہ ملیریا کے باعث سب سے زیادہ ہلاکتیں دنیا کے غریب ترین ممالک میں ہوتی ہیں۔
دنیا کے دوسرے امیر ترین شخص نے اس حوالے سے نشاندہی کی کہ کورونا وائرس کے نتیجے میں ملیریا کی روک تھام اور علاج کی سہولیات بری طرح متاثر ہوئی ہیں، جس کے نتیجے میں ہلاکتوں کے بڑھ جانے خطرہ بڑھ سکتا ہے۔
خیال رہے کہ ملیریا کا خاتمہ طویل عرصے سے بل اینڈ ملینڈا گیٹس فاﺅنڈیشن کی ترجیحات میں شامل ہے اور اس کے لئے ایک حکمت عملی پر بھی کام ہورہا ہے۔