گزشتہ ہفتے کراچی میں موسلادھار بارشیں ہوئیں جس کی وجہ سے شہرِ قائد کا نقشہ ہی تبدیل ہوکر رہ گیا۔ شہر میں منگل اور جمعرات کے روز مسلسل بارش ہوتی رہی جس سے شہر کے کئی علاقے زیرِآب آگئے۔
تاہم بارشوں کے بعد کراچی کے ڈوبنے کی اصل وجہ منظرِ عام پر آگئی ہے۔
شہر کے ڈوبنے کی بنیادی وجہ کراچی کے 27 نالوں پر قائم تجاوزات ہیں۔
کراچی کے 27 نالوں پر کہیں 5 تو کہیں 80 فیصد تک تجاوزات موجود ہیں۔
تفصیلات کے مطابق شہرِ قائد کے علاقے لیاری، ہارون آباد اور پہلوان گوٹھ نالے پر 30،30 فیصد تجاوزات قائم ہیں۔ ساڑھے 13 کلو میٹر طویل گجر نالے پر ہزاروں گھر تعمیر ہیں۔ تاہم گجر نالے پر قائم ہزاروں گھروں کی منتقلی اور متبادل گھروں کے لیے اربوں روپے درکار ہیں۔
برساتی نالوں پر قائم تجاوزات کا سروے محکمہ آبپاشی سندھ اور بلدیہ عظمیٰ کراچی (کے ایم سی) نے چند سال قبل کیا تھا، جبکہ سروے کے بعد سے اب تک تجاوزات میں کافی حد تک اضافہ ہوا ہے۔ تجاوزات ہٹانے کے حوالے سے تاحال کوئی کارروائی نہیں کی گئی۔
یاد رہے شہر میں ہونے والی حالیہ طوفانی بارشوں کے سبب کراچی کے مختلف علاقوں میں اب تک پانی کھڑا ہے جس میں کلفٹن، ڈیفنس، سرجانی ٹاؤن اور اورنگی ٹاؤن کے علاقے سرِ فہرست ہیں۔