صوبہ سندھ کے وزیر تعلیم سعید غنی نے پری پرائمری اور پرائمری اسکولوں میں تدریسی عمل جاری رکھنے کے خلاف ایکشن لیتے ہوئے 2 اسکول سیل کرنے کا حکم جاری کر دیا۔
تفصیلات کے مطابق کراچی کے علاقے اورنگی ٹاؤن میں وزیر تعلیم سعید غنی 2 نجی اسکولز کے معائنے کے لئے اچانک پہنچے، اُس دوران پری پرائمری اور پرائمری اسکولوں میں تدریسی عمل جاری تھا۔
اِس موقع پر وزیر تعلیم نے ڈی سی ویسٹ کو فوری طور پر اسکول سیل کرنے کا حکم جاری کردیا، ذرائع کے مطابق اسکولوں میں ایس او پیز کے ناقص انتظامات دیکھتے ہوئے سیل کرنے حکم دیا۔
علاوہ ازیں سعید غنی نے شہر کے مختلف نجی اور سرکاری اسکولوں کا بھی دورہ کیا، صوبائی وزیر نے گارڈن میں نجی اسکول میں تعلیمی اداروں کا جائزہ لیا اور کہا کہ تمام ایس او پیز کا مکمل خیال رکھا جائے ساتھ ہی اسکول انتظامیہ، اساتذہ اور والدین کو بھی ایس او پیز پر عملدرآمد کرنے کی تجویز پیش کی۔
انہوں نے اسکول پرنسپل کو ہدایت کی کہ ہر کلاس میں ہینڈ سینیٹائزز رکھا جائے اور کلاسز میں سماجی فاصلے کا خاص خیال رکھا جائے۔
واضح رہے کہ کورونا وائرس کے سبب ملک بھر میں تقریباً 7 ماہ سے بند تعلیمی اداروں کو 15 ستمبر سے کھولا گیا ہے۔