براڈ شیٹ کیس میں پاکستان تحریک انصاف کا کوئی کردار نہیں ہے، اعجاز احمد شاہ

بول نیوز  |  Jan 24, 2021

وفاقی وزیر انسداد منشیات اعجاز احمد شاہ نے کہا ہے کہ براڈ شیٹ کیس میں پاکستان تحریک انصاف کا کوئی کردار نہیں ہے۔

تفصیلات کے مطابق وفاقی وزیر انسداد منشیات اعجاز احمد شاہ نے میڈیا سے گفتگو کرتے ہوئے کہا کہ خود اپوزیشن جماعتوں نے براڈ شیٹ کی تحقیقات کا مطالبہ کیا تھا اور اب براڈ شیٹ کے لئے تحقیقاتی کمیٹی پر اپوزیشن کا اعتراض بلا جواز ہے۔

اعجاز احمد شاہ نے کہا کہ براڈ شیٹ کیس اٹھارہ سال قبل کا سکینڈل ہے جس کا فیصلہ بھی 2018 میں آچکا تھا جبکہ پی ٹی آئی حکومت  نے اب ادائیگی اس لئے کی کیونکہ پاکستان کو پانچ ہزار پاؤنڈ روزانہ جرمانہ ہو رہا تھا۔

وفاقی وزیر انسداد منشیات نے یہ بھی کہا کہ حکومت نے عوام کو براڈ شیٹ سکینڈل کی اصل حقیقت بتانے کے لئے تحقیقاتی کمیٹی بنائی اور سکینڈل کی تحقیقات کے لئے حکومت جو بھی کمیٹی بنائے گی اپوزیشن اس پر اعتراض کرے گی۔

اعجاز احمد شاہ کا کہنا تھا کہ وزیر اعلیٰ پنجاب سے ہونے والی ملاقات میں منشیات فروشوں کے خلاف بھرپور کریک ڈاؤن پر اتفاق ہوا ہے، کریک ڈاؤن کے لئے پنجاب پولیس، کسٹم ،ایکسائز سمیت تمام اداروں سے تعاون لیا جا ئے گا۔

وفاقی وزیر انسداد منشیات کا یہ بھی کہنا تھا کہ منشیات فروش ہماری نسلوں کو کھوکھلا کر رہے ہیں، منشیات فروشی کے خاتمے کے لئے ہر پاکستانی کو اپنا کردار ادا کرنا ہو گا۔

اعجاز احمد شاہ نے کہا کہ پنجاب حکومت ویلج کونسل کی سطح پر بلدیاتی الیکشن کروانے کے لئے تیار ہے، ستمبر تک الیکشن کمیشن کو لوکل باڈی آرڈیننس کے بارے بتا دیا جائے گا۔

وفاقی وزیر انسداد منشیات اعجاز احمد شاہ نے مزید کہا کہ الیکشن کمیشن بلدیاتی الیکشن کا شیڈول دے گا جبکہ بچیکی بچیانہ روڈ اوربچیکی ننکانہ روڈ سمیت مختلف سڑکوں کی تعمیر پر کام کا جلد آغاز ہو جا ئے گا۔

-->
مزید خبریں

Disclaimer: Urduwire.com is only the source of Urdu Meta News (type of Google News) and display news on “as it is” based from leading Urdu news web based sources. If you are a general user or webmaster, and want to know how it works? Read More