احمد آباد ٹیسٹ صرف دو دن میں ختم، انڈیا کی انگلینڈ کو شکست

اردو نیوز  |  Feb 25, 2021

انڈیا اور انگلینڈ کے درمیان چار ٹیسٹ میچوں کی سیزیز کا تیسرا ڈے اینڈ نائٹ ٹیسٹ میچ انڈیا نے 10 وکٹوں سے جیت لیا ہے۔

انگلینڈ نے انڈیا کو فتح کے لیے 49 رنز کا مختصر ٹارگٹ دیا تھا۔ جو انڈیا نے آٹھویں اوور میں بغیر کسی نقصان کے پورا کر لیا۔ روہت شرما 25 اور شھبمن گل 15 رنز کے ساتھ ناٹ آؤٹ رہے۔ 

 

جمعرات کا دن ایک بار پھر انڈین بولرز کے نام رہا اور انہوں نے انگلینڈ کی پوری ٹیم کو دوسری اننگز میں 81 رنز پر آؤٹ کر دیا۔

انگلینڈ کے اوپنرز ایک بار پھر ناکام رہے اور زیک کرالی، اگزر پٹیل کی پہلی ہی گیند پر آؤٹ ہو گئے۔ اگزر پٹیل نے اپنی تیسری گیند پر جونی بیرسٹو کو بھی بولڈ کر دیا۔

اس کے بعد ڈوم سبلی بھی اگزر پٹیل کا نشانہ بنا۔ جو روٹ اور بین اسٹوکس نے کچھ مزاحمت کی کوشش کی لیکن بین اسٹوکس 25 رنز بنا کر روی چندرن اشون کی گیند پر ایل بی ڈبلیو ہو گئے۔

انگلینڈ کے پانچویں آؤٹ ہونے والے کھلاڑی کپتان جو روٹ تھے۔ انہیں بھی اگزر پٹیل نے آؤٹ کیا۔

اولی پوپ بھی 12 رنز ہی بنا پائے اور روی چندرن اشون کی گیند پر بولڈ ہو گئے۔ اس کے بعد جوفرا آرچر بھی صفر پر آؤٹ ہو گئے۔ بین فوکس کو اگزر پٹیل نے ایل بی ڈبلیو کر کے اننگز میں اپنی پانچویں اور میچ کی 11ویں وکٹ حاصل کی۔

اگزر پٹیل نے میچ میں 11 وکٹیں حاصل کی ہیں۔ (فوٹو: بی سی سی آئی)بین فوکس کے بعد جیک لیچ نو رنز بنا کر روی چندرن اشون اور جیمز اینڈرسن صفر پر واشنگٹن سندر کا نشانہ بنیں۔

انگلینڈ کے چار کھلاڑی دوسری اننگز میں صفر پر آؤٹ ہوئے۔ جبکہ انڈیا کی طرف سے اگزر پٹیل نے پانچ اور روی چندرن اشون نے چار کھلاڑیوں کو آؤٹ کیا۔ روی چندرن اشون نے اپنی چار سو ٹیسٹ وکٹیں بھی پوری کر لی ہیں۔

اس سے قبل انڈیا کی ٹیم اپنی پہلی اننگز میں 145 رنز بنا کر آؤٹ ہو گئی تھی۔ انڈیا کی طرف سے روہت شرما نے 66 رنز بنائے تھے۔ انگلینڈ کی طرف سے جو روٹ نے پانچ کھلاڑیوں کو آؤٹ کیا تھا۔

جبکہ انگلینڈ کی ٹیم اپنی پہلی اننگز میں 112 سکور پر آؤٹ ہو گئی تھی۔

انڈیا کے بولرز کی شاندار کارکردگی کو سوشل میڈیا پر بھی سراہا جا رہا ہے۔ دنیا کے عظیم بلے باز سچن ٹنڈولکر نے روی چندرن اشون کو ان کی چار سو وکٹوں پر مبارک باد دیتے ہوئے ٹویٹ کیا کہ ’لاجواب متسقل مزاجی! بہت اعلیٰ، لگے رہو اشون۔ آپ کی بولنگ دیکھ کر خوشی ہوئی۔‘

روی چندرن اشون کو انڈیا کی طرف سے چار سو وکٹیں لینے والے چوتھے بولر بننے پر آئی سی سی نے بھی ٹوئٹر پر مبارک باد دی ہے۔

جبکہ ایک انڈین صارف نے پاکستانی بلاگر کی مشہور ’یہ ہماری پاری ہو رہی ہے‘ کی تصویر کے ساتھ لکھا ’انڈین ٹیم اس وقت۔‘

دوسری جانب انگلینڈ کے سابق کھلاڑیوں کی جانب سے انڈیا کو ایسی وکٹ بنانے پر ہلکے انداز میں طنز کا نشانہ بنایا گیا ہے۔

سابق کپتان مائیکل وان نے ٹویٹ کرتے ہوئے لکھا کہ ’اگر ہمیں ایسی ہی پچز دیکھنی ہیں اور ان پر کھیلنا کیسے ہیں تو میرا جواب ہے کہ ٹیموں کو تین اننگز دیں۔‘

انگلینڈ کے سابق جارحانہ بلے باز کیون پیٹرسن نے بھی اس حوالے سے ٹویٹ کرتے ہوئے کہا کہ ’ایک میچ کے لیے ایسا وکٹ ٹھیک ہے جہاں بلے باز کی تکنیک اور صلاحیتوں کا امتحان ہوتا ہے۔ لیکن میں اس طرح کا وکٹ اور نہیں دیکھنا چاہتا اور مجھے لگتا ہے، سارے کھلاڑی بھی نہیں دیکھنا چاہتے۔ بہت اچھے انڈیا۔‘

خیال رہے کہ اس ٹیسٹ سیریز کے پہلے میچ میں انگلینڈ نے فتح حاصل کی تھی جبکہ دوسرا ٹیسٹ انڈیا نے جیتا تھا۔

مزید خبریں

Disclaimer: Urduwire.com is only the source of Urdu Meta News (type of Google News) and display news on “as it is” based from leading Urdu news web based sources. If you are a general user or webmaster, and want to know how it works? Read More