حکومت کو ڈیجیٹل ایڈورٹائزنگ پالیسی ترتیب دینے کی تجویز

بول نیوز  |  Mar 08, 2021

وزیر اعظم عمران خان سے وفاقی وزیر اطلاعات شبلی فرازکی ملاقات ہوئی  ہے جس میں  وزیر اعظم کو وزارت اطلاعات و نشریات کی جانب سے تجویز کردہ ڈیجیٹل ایڈورٹائزنگ پالیسی کے حوالے سے آگاہ کیا گیا ہے۔

تفصیلات کے مطابق اس موقع پر وزیراعظم کے ڈیجیٹل میڈیا فوکل پرسن ڈاکٹر ارسلان خالد اور ڈیجیٹل میڈیا ونگ کے جنرل مینجر عمران غزالی بھی موجود تھے۔

 وزیراعظم کو بریفنگ دیتے ہوئے ڈاکٹر ارسلان خالد نے کہا کہ پاکستان میں فی الوقت 93 ملین انٹرنیٹ صارفین موجود ہیں اور یہ تعداد مسلسل بڑھ رہی ہے۔

 وزیراعظم کو بریفنگ میں انٹرنیٹ صارفین کی تیزی سے بڑھتی تعداد کے رحجان کو مدنظر رکھتے ہوئے ڈیجیٹل ایڈورٹائزنگ پالیسی ترتیب دینے کی بھی تجویز پیش کی گئی۔

بریفنگ میں کہا گیا کہ فی الحال وفاقی حکومت کی ڈیجیٹل میڈیا ایڈورٹائزمنٹ کا کوئی طریقہ کار موجود نہیں، منظوری کے بعد یہ حکومت پاکستان کی تاریخ کی پہلی پالیسی ہوگی۔

وزیراعظم کو بریفنگ میں مزید بتایا گیا کہ وزارت اطلاعات و نشریات کے ذریعے حکومت ڈیجیٹل اور سوشل میڈیا پلیٹ فارمز پر تشہیر کرسکے گی، پاکستان کی ڈیجیٹل میڈیا صنعت تیزی سے پھیل رہی ہے۔

 بریفنگ کے مطابق مذکورہ پالیسی کے تحت نئے ڈیجیٹل پلیٹ فارمز اور پبلشرز کی حوصلہ افزائی ہو گی اور پاکستانی معیشت کو بھی فائدہ پہنچے گا۔

اس کے علاوہ ڈیجیٹل میڈیا کی توثیق سے کارپوریٹ سیکٹر بھی ڈیجیٹل میڈیا کو بطور اشتہاری مہم استعمال کرنے کی جانب راغب ہوگا۔

اس موقع پر وزیراعظم کو مزید بتایا گیا کہ پروگرام کے نتیجے میں پاکستانی ڈیجیٹل میڈیا کی ترقی و ترویج اور نچلی سطح تک ڈیجیٹل خواندگی کا فروغ ممکن ہوگا۔ پی ایم ڈی پی طلباء، حکومت پاکستان اور ڈیجیٹل میڈیا کے درمیان فاصلے کم کرے گا اور ڈیجیٹل میڈیا کا محفوظ مستقبل یقینی بنائے گا۔

-->
مزید خبریں

Disclaimer: Urduwire.com is only the source of Urdu Meta News (type of Google News) and display news on “as it is” based from leading Urdu news web based sources. If you are a general user or webmaster, and want to know how it works? Read More