پاکستانی شوبز انڈسری کی معروف اداکار جوڑی اقراء عزیز اور یاسر حسین اکثر ہی سوشل میڈیا پر خبروں کی زینت بنے رہتے ہیں۔ گزشتہ روز اقراء عزیز اور یاسر حسین کے گھر ننھے مہمان کی آمد کی خبریں پورے سوشل میڈیا پر چھائی ہوئی ہیں۔ اداکار جوڑی کے ہاں رواں برس جولائی میں پہلے بچے کی آمد متوقع ہے۔
گزشتہ روز باقاعدہ طور پر اقراء عزیز کی گود بھرائی کی رسم بھی کی گئی جس میں اہلخانہ سمیت مختلف شوبز شخصیات نے بھی شرکت کی اور رسم کی خوبصورت تصاویر بھی شیئر کی گئیں۔
اب اس تقریب سے متعلق ایک اور منفرد چیز اداکارہ اقراء عزیز کا گودبھرائی کی تقریب میں پہنا جانے والا دوپٹہ ہے جسے خوبصورت پھولوں اور اردو اسکرپٹ کے ساتھ تیار کیا گیا ہے۔100 خاص پیغامات سے مزین منفرد اور خوبصورت دوپٹہ ڈیزائنر فہد حسین کا تیار کردہ ہے۔
سوشل میڈیا پلیٹ فارم انسٹاگرام پر فہد حسین کی جانب سے اقراء یاسر کی خوبصورت تصویر شیئر کرتے ہوئے جوڑے کے لیے ایک پیغام درج کیا گیا۔
ڈیزائنر کی جانب سے انسٹاگرام پوسٹ پر جوڑے کو بچے کی متوقع آمد پر مبارکباد پیش کرتے ہوئے لکھا گیا کہ ہمیں آپ کی نئی شروعات کا حصہ بننا پسند آیا۔
فہد حسین کی پوسٹ کے مطابق ’سو دعاؤں‘ والے ڈیزائن کو خاص طور پر اداکار اور بہترین دوست اقراء عزیز کے لیے بہت سی محبت کے ساتھ آراستہ کیا گیا ہے۔
ڈیزائنر نے مزید لکھا کہ دوپٹے پر زردوزی سے 100 دعاؤں کی دستکاری کی گئی ہے۔