ایون فیلڈ ریفرنس فیصلے پر اپیلوں کی سماعت 30 دن میں مکمل کرنے کی نیب کی درخواست مسترد

اردو نیوز  |  Oct 14, 2021

اسلام آباد ہائیکورٹ نے ایون فیلڈ ریفرنس فیصلے کے خلاف اپیلوں کی روزانہ سماعت کر کے 30 دن میں فیصلہ کرنے کے لیے نیب کی دائر کردہ درخواست کو مسترد کر دیا ہے۔

جمعرات کو جاری کیے گئے تحریری فیصلے میں اسلام آباد ہائیکورٹ نے کہا ہے کہ نیب آرڈیننس کا سیکشن 16 اے ریفرنس کا ٹرائل 30 دن میں مکمل کرنے سے متعلق ہے اس میں فیصلے کے خلاف دائر اپیل کا فیصلہ کرنے کے لیے وقت کا تعین نہیں کیا گیا۔ تحریری فیصلہ جسٹس عامر فاروق اور جسٹس محسن اختر کیانی پر مشتمل ڈویژنل بینچ نے جاری کیا۔ 

ہائی کورٹ نے اپنے فیصلے میں کہا ہے کہ نیب کی 30 دن میں سماعت مکمل کر کے فیصلہ سنانے کی درخواست غلط فہمی پر مبنی ہے۔

نیب نے اپنی درخواست میں کہا تھا کہ اپیلوں پر سماعت سنہ 2018 سے زیر التوا ہے۔ 

واضح رہے کہ احتساب عدالت نے ایون فیلڈ ریفرنس میں میاں نواز شریف کو دس سال، مریم نواز کو سات سال جبکہ کیپٹن ریٹائرڈ محمد صفدر کو ایک سال قید اور جرمانے کی سزا سنائی تھی۔

مسلم لیگ ن کی رہنما مریم نواز اور دیگر نے ایون فیلڈ ریفرنس میں احتساب عدالت سے سنائی گئی سزا کو اسلام آباد ہائیکورٹ میں چیلنج کر رکھا ہے۔

ہائیکورٹ نے نیب عدالت کی سنائی گئی سزا میں مریم نواز کو ضمانت دے رکھی ہے۔

گزشتہ ہفتے مریم نواز نے ہائیکورٹ میں دائر کی گئی متفرق درخواست میں موقف اختیار کیا کہ احتساب عدالت نے چھ جولائی 2017 کو ایون فیلڈ ریفرنس میں سزا سنائی، جو پاکستان کی تاریخ میں سیاسی انجینئرنگ اور قانون کی سنگین خلاف ورزیوں کی کلاسک مثال ہے۔

اس درخواست پر ان کے وکیل عرفان قادر نے عدالت میں دلائل دیے۔

مزید خبریں

Disclaimer: Urduwire.com is only the source of Urdu Meta News (type of Google News) and display news on “as it is” based from leading Urdu news web based sources. If you are a general user or webmaster, and want to know how it works? Read More