امریکہ کا پاکستان میں سیلاب سے متاثرہ علاقوں کے لیے ایک لاکھ ڈالر کا اعلان

اردو نیوز  |  Aug 16, 2022

امریکہ نے پاکستان میں سیلاب سے متاثرہ افراد کی مدد کے لیے ایک لاکھ ڈالر کی امداد کا اعلان کیا ہے۔

امریکی سفارتخانے نے منگل کو ٹوئٹر پر سفیر ڈونلڈ بلوم سے منسوب ایک بیان میں کہا کہ ’امریکہ پاکستان میں شدید سیلاب سے متاثرہ افراد کے ساتھ کھڑا ہے۔‘

امریکی سفیر ڈونلڈ بلوم کا کہنا ہے کہ انہوں نے سیلاب کے بعد انسانی ضروریات کو مدنظر رکھتے ہوئے مدد کی اپیل کی اور جواب میں امریکی امدادی ادارے یو ایس ایڈ نے متاثرہ آبادی کے لیے ایک لاکھ ڈالرز فراہم کرنے کا اعلان کیا ہے۔

امریکی سفیر کا مزید کہنا تھا کہ امداد سے ضروری اشیاء خریدنے میں مدد ملے گی جس سے لوگوں کی پریشانیوں میں کمی آئے گی۔

’اس مصیبت کے نتیجے میں انسانی جانوں کا ضیاع ہوا ہے، بہت سے لوگوں کے پیارے کھو گئے، روزگار اور گھر تباہ ہوئے۔‘

ڈونلڈ بلوم کا مزید کہنا تھا کہ وہ پاکستان میں موجود اپنے شراکت داروں کے ساتھ مل کر سیلاب زدہ افراد کی مدد کریں گے۔

"This disaster has resulted in a catastrophic loss of life, with many losing their loved ones, their livelihoods, and their homes. We will work closely in coordination with partners on the ground to support these crucial humanitarian assistance efforts." -DB #AmbBlome 3/3

— U.S. Embassy Islamabad (@usembislamabad) August 16, 2022

پاکستان میں جاری مون سون بارشوں سے ملک بھر میں بھاری جانی و مالی نقصان دیکھنے میں آیا ہے۔ صوبہ بلوچستان ان بارشوں اور سیلاب سے سب سے زیادہ متاثر ہوا ہے۔

بلوچستان حکومت کا کہنا ہے کہ سیلاب سے ہونے والے نقصانات کے ازالے اور متاثرین کی بحالی کے لیے کم از کم 35 ارب روپے کی ضرورت ہے۔

صوبے میں سیلاب کے باعث ہلاکتوں کی تعداد بڑھ کر 196 تک پہنچ چکی ہے۔

بلوچستان کے وزیراعلٰی عبدالقدوس بزنجو نے کہا کہ بلوچستان میں سیلاب سے ہونے والے نقصانات کے ازالے کے لیے 15 ارب روپے اور بحالی کے مرحلے کے لیے 20 ارب روپے درکار ہیں۔ وزیراعلٰی نے بلوچستان کی جانب سے وفاقی اداروں کی شراکت سے نقصانات کے مشترکہ سروے پر آمادگی کا اظہار کیا۔

مزید خبریں

Disclaimer: Urduwire.com is only the source of Urdu Meta News (type of Google News) and display news on “as it is” based from leading Urdu news web based sources. If you are a general user or webmaster, and want to know how it works? Read More