کراچی کے علاقے لیاری میں میراں ناکا محمدی مسجد کے قریب گھر میں اچانک گیس کی لیکیج ہوگئی جس کے باعث ایک ہی گھر کے پانچوں افراد جھلس گئے۔
واقعہ گھر میں موجود سیلینڈر کی وجہ سے پیش آیا۔
محلے والوں نے فوری طور پر فائر بریگیڈ کو اطلاع کی اور جھلسنے والوں کو قریبی ہسپتال منتقل کردیا۔ جلنے والوں میں
40 سالہ عارف ولد غوث محمد اور ان کی 35 سالہ زوجہ سمیرا ، 13 سالہ بیٹی عریبہ، 12 سالہ بیٹا ایان، 8 سالہ بیٹی ایمان اور 2 سالہ بیٹی عنایا شامل ہیں۔
واضح رہے اس سے قبل بھی گیس لیکیج کے واقعات رونما ہوچکے ہیں جن میں سے اکثریت کی وجہ یہ ہے کہ کراچی کے مختلف علاقوں میں گیس کی لوڈشیڈنگ کے باعث عوام حد سے زیادہ پریشان ہے اور اگر گیس آ بھی رہی ہوتی ہے تو وہ کم ہوتی ہے جس سے روٹی پکانا مشکل ہے۔ اسی وجہ سے لوگوں نے گھروں میں گیس کا برنر اور مشین رکھی ہوئی ہے تاکہ گیس زیادہ پریشر سے مل سکے۔ دراصل یہی گیس لیکیج اور بعد ازاں دھماکے کا باعث بنتی ہے۔