Getty Images
گذشتہ ڈیڑھ سال کے دوران افغانستان میں صرف انسانی حقوق خصوصاً خواتین کے حقوق کا معاملہ ہی زوال پذیر نہیں رہا بلکہ جولائی 2021 میں طالبان کے اقتدار سنبھالنے کے بعد سے ملک کی معاشی صورتحال بھی مخدوش ہوئی۔
عالمی بینک کے اعداد و شمار کے مطابق 368 ملین ڈالر جی ڈی پی کے ساتھ افغانستان دنیا کے سب سے غریب ممالک میں شمار ہوتا ہے۔
ملک کی تقریباً آدھی آبادی، یعنی چار کروڑ سے زیادہ افراد، کو غذائی قلت کا سامنا ہے۔ یہ اعداد و شمار دنیا میں سب سے زیادہ ہیں۔ اقوام متحدہ کے ورلڈ فوڈ پروگرام کے مطابقافغانستان میں غذائی قلت کا شکار افراد کی تعداد میں گذشتہ سال کے مقابلے میں 11 فیصد کا اضافہ ہوا ہے۔
بیرونی امداد میں کمی، زلزلے اور سیلاب جیسی قدرتی آفات اور عالمی سطح پر مہنگائی کی لہر وہ عوامل ہیں جنھوں نے افغانستان میں معاشی بحران کی شدت میں مذید اضافہ کیا ہے۔
عالمی پابندیوں کے بعد امریکہ کی جانب سے افغانستان کے مرکزی بینک کے تقریباً 10 ارب ڈالر کے اثاثے منجمد کرنے کے فیصلے نے بھی منفی اثرات مرتب کیے۔
Getty Images
ایسے حالات میں طالبان کی حکومت معیشت کو چلانے کے لیے چند پرانے اور کچھ نئے ذرائع پر انحصار کر رہی ہے۔
’ٹیکس اکھٹا کرنے کا ہفتہ‘
اقتدار میں آنے کے بعد سے طالبان حکومت نے زیادہ ٹیکس اکھٹا کرنا شروع کیا ہے۔
کینیڈین محقق گریم سمتھ نے بی بی سی کو بتایا کہ طالبان نے پورے افغانستان پر کنٹرول حاصل کر لیا ہے جو ان سے پہلے دہائیوں تک کوئی اور نہیں کر سکا تھا اور اس سے انھیں زیادہ ٹیکس اکھٹا کرنے میں مدد ملی ہے۔
ورلڈ بینک کے مطابق دسمبر 2021 سے اکتوبر 2022 تک طالبان حکومت نے ڈیڑھ ارب ڈالر سے زیادہ ٹیکس اکھٹا کیا جو اس سے پہلے دو سال کے اسی عرصے میں اکھٹا ہونے والے ٹیکس سے زیادہ ہے۔
اس حوالے سے سرحد کا کنٹرول اہم ہے جہاں سے 2022 میں مجموعی ٹیکس کا 69 فیصد حصہ وصول کیا گیا۔ اس سے قبل ٹیکس کا یہ حجم تقریباً نصف رہتا تھا۔
گریم سمتھ کا کہنا ہے کہ کسٹم کا شعبہ طالبان حکومت کی آمدن کا اہم ذریعہ بن چکا ہے۔
Getty Images
علی حسینی ایک افغان صحافی ہیں۔ وہ کہتے ہیں کہ طالبان کو اب تمام سرکاری دفاتر اور سرحدی راستوں پر مکمل کنٹرول حاصل ہے اور وہ مختلف قسم کے ٹیکس خصوصاً درآمدات پر ٹیکس وصول کر سکتے ہیں۔
موسمی حالات اور ملک میں زراعت اور انڈسٹریل شعبے کی کم ترقی کی وجہ سے افغانستان درآمدات پر انحصار کرتا ہے۔
علی حسینی کا ماننا ہے کہ ملک کے ماضی کے حکمرانوں کے مقابلے میں طالبان ٹیکس کے معاملے میں زیادہ سخت ہیں۔
’پہلے پیسہ لوگوں کی جیب میں جاتا تھا لیکن اب کرپشن میں کمی ہوئی ہے اور ٹیکس کا زیادہ حصہ حکومت کے پاس پہنچتا ہے۔‘
طالبان حکومت نے ملک بھر میں ٹیکس اکھٹا کرنے کا ہفتہ منانے کے رواج کا بھی آغاز کیا ہے۔
عشر اور زکوٰۃ
روایتی ٹیکس کے علاوہ طالبان مذہبی ٹیکس بھی لیتے ہیں جن کو عشر اور زکوٰۃ (زکات) کہا جاتا ہے۔
سنہ 2021 میں اقتدار سنبھالنے سے پہلے بھی طالبان اپنے زیر اثر علاقوں سے یہ ٹیکس وصول کیا کرتے تھے۔
Getty Images
علی حسینی کا کہنا ہے کہ ہر شخص اپنی دولت کا پانچواں حصہ حکومت کو دیتا ہے اور اگرچہ مکمل اعداد وشمار موجود نہیں ہیں لیکن یہ ایک بڑی رقم بنتی ہے کیوںکہ 99 فیصد افغان شہری مسلمان ہیں اور ان کو حکومت کو زکات دینے کے اسلامی عمل کی پاسداری کرنی پڑتی ہے۔
گریم سمتھ کا کہنا ہے کہ عشر اورزکوٰۃ سے حاصل ہونے والے ٹیکس کا حجم معلوم کرنا مشکل ہے۔
وہ کہتے ہیں کہ طالبان اپنے مالی معاملات میں شفافیت نہیں رکھتے اس لیے ہم کچھ نہیں جانتے۔
یہ بھی پڑھیے
افغانستان میں زیر زمین سونا، تانبا اور لیتھیم بھرا پڑا ہے، یہ خزانہ اب کس کے ہاتھ آئے گا؟
پاکستان اور افغانستان کی سرحد پر منشیات کی ’بڑھتی ہوئی سمگلنگ‘، وجہ کیا ہے؟
افغانستان کے جغرافیے میں چھپا وہ راز جو اسے ’سلطنتوں کا قبرستان‘ بناتا ہے
معدنیاتGetty Images
کوئلہ، تیل، قدرتی گیس، تانبا اور قیمتی پتھروں جیسی معدنی دولت افغانستان میں وافر مقدار میں موجود ہے۔
ان وسائل کی مجموعی قیمت کا تخمینہ امریکی محکمہ دفاع کے ماہرین کی جانب سے تقریباً ایک کھرب ڈالر لگایا گیا ہے۔
تاہم ان کو نکالنے کا عمل مشینری اور ٹرانسپورٹ کی مد میں کافی سرمایہ مانگتا ہے اور ملک میں سیاسی عدم استحکام کی وجہ سے اس شعبے میں بیرونی سرمایہ کاری ممکن نہیں ہو سکی۔
گریم سمتھ کا کہنا ہے کہ ایسا لگتا ہے کہ مستقبل قریب تک یہ دولت زیر زمین ہی رہے گی۔
ان کا کہنا ہے کہ ’اگر آپ سونا اور کاپر افغانستان سے باہر لے جانا چاہتے ہیں تو ریلوے کا نظام بنانا ہو گا جس کے لیے بڑی سرمایہ کاری درکار ہو گی اور اس وقت اتنے بڑے پیمانے پر سرمایہ کاری کے لیے کوئی تیار نہیں ہے۔‘
اس وقت افغانستان کی سب سے بڑی برآمد کوئلے کی شکل میں ہو رہی ہے جس کا بڑا حصہ پاکستان بھیجا جاتا ہے۔
Getty Images
طالبان حکومت کے پہلے سال میں کوئلے کی فروخت میں 20 فیصد اضافہ ہوا جو حکومتی اعداد و شمار کے مطابق تقریبا روزانہ 10 ہزار ٹن کے قریب ہے۔
ایک حالیہ ورلڈ بینک کی رپورٹ کے مطابق کوئلے کی برآمد میں اضافے کی وجہ سے افغانستان کی سالانہ برآمدات میں مجموعی طور پر 90 فیصد اضافہ ہوا جو 1.7 ارب ڈالر تک جا پہنچی ہیں۔ اس کا 65 فیصد حصہ پاکستان جاتا ہے جو افغان ٹیکسٹائل اور زرعی مصنوعات کی بھی اہم منزل ہے جبکہ 20 فیصد انڈیا جاتا ہے۔
سنہ 2021 تک افغانستان میں 126 چھوٹی کانیں موجود تھی اور طالبان کی وزارت معدنیات اور تیل کے مطابق ایک سال میں اس تعداد میں 60 کانوں کا اضافہ ہوا ہے جبکہ متعدد نئے معاہدے بھی کیے جا رہے ہیں۔
علی حسینی کا کہنا ہے کہ متعدد چینی کمپنیاں طالبان حکومت کے ساتھ مذاکرات کر رہی ہیں اور خصوصاً کاپر یعنی تانبے کے لیے معاہدے ہو سکتے ہیں۔
رواں ماہ طالبان حکومت نے اعلان کیا کہ وہ چینی کمپنی کے ساتھ تیل نکالنے کا معاہدہ کرنے والے ہیں جو اب تک کا سب سے بڑا بیرونی معاہدہ ہو گا۔
منشیات؟
اقتدار میں آنے سے قبل طالبان کی آمدن کا بڑا حصہ مجرمانہ سرگرمیوں سے حاصل ہوتا تھا جس میں اغوا اور بھتے کے ساتھ ساتھ منشیات خصوصاً افیون کی کاشت اور فروخت شامل تھی۔
اقوام متحدہ کے اعداد و شمار کے مطابق افغانستان دنیا بھر میں غیر قانونی افیون کا 80 فیصد حصہ بھیجتا تھا۔
Getty Images
لیکن اپریل 2022 میں طالبان نے ملک میں افیون کی کاشت پر پابندی لگا دی تھی۔
افیون کو ہیروئن اور دیگر نشہ آور منشیات کی تیاری کے لیے استعمال کیا جاتا ہے اور ملک کے کرپٹ حکمرانوں اور حکام کے ساتھ ساتھ یہ کسانوں اور مقامی بااثر شخصیات، جنھیں ’وار لارڈز‘ کہا جاتا ہے، کے لیے ایک زرخیز ذریعہ آمدن تھا۔
اقتدار میں آنے سے قبل طالبان بھی افیون کی فروخت سے پیسہ حاصل کرتے تھے تو پھر انھوں نے ایسا کرنا کیوں چھوڑ دیا؟
جولائی میں امریکہ کی حکومت نے ایک رپورٹ شائع کی جس کے مطابق طالبان حکومت منشیات پر پابندی کے اعلان پر قائم ہے اگرچہ اس فیصلے کے بعد انھیں کسانوں اور منشیات کے کاروبار میں ملوث دیگر افراد کی حمایت کھونے کا خدشہ ہے۔
تاہم علی حسینی کا ماننا ہے کہ چھوٹے پیمانے پر طالبان اب بھی منشیات کی سمگلنگ سے پیسہ حاصل کر رہے ہیں۔
ان کا کہنا ہے کہ اگرچہ طالبان کی حکومت نے کاشت پر پابندی لگا دی ہے لیکن اب بھی کاشت ہو رہی ہے اور سمگلنگ بھی ہو رہی ہے۔
درحقیقت پابندی کے اعلان کے آٹھ ماہ بعد اقوام متحدہ کے دفتر برائے منشیات کی رپورٹ کے مطابق تقریبا ڈھائی لاکھ ہیکٹر پر افیون کی کاشت ہوئی۔
علی حسینی کا کہنا ہے کہ اس کاشت سے اکھٹا ہونے والا پیسہ ماضی کی حکومت کے برعکس حکومتی خزانے میں پہنچا۔