تعلیم کے معیار کو بہتر بنانے پر بھی توجہ مرکوز کئے ہوئے ہیں ،وفاقی وزیر تعلیم

اسلام آباد۔8مئی (اے پی پی):وفاقی وزیر تعلیم و پیشہ وارانہ تربیت خالد مقبول صدیقی نے کہا ہے کہ ملک میں ناخواندگی اور غربت کے چیلنج کو قبول کرنے کے علاوہ ہمارے پاس کوئی دوسرا راستہ نہیں، تعلیم ہمارے ایجنڈے پر سرفہرست ہے۔

بدھ کو قومی تعلیم کانفرنس سے خطاب کرتے ہوئے انہوں نے کہا کہ ہم تعلیم کے معیار کو بہتر بنانے پر بھی توجہ مرکوز کئے ہوئے ہیں ،ہمارے ملک کے 26 ملین بچے سکولوں سے باہر ہیں، یہ تعداد دنیا کے 150 ممالک کی آبادی سے زیادہ ہے۔ انہوں نے کہا کہ وزیر تعلیم کے عہدے کا حلف اٹھانے کے بعد اس چیلنج کو قبول کیا، تعلیم ہمارے ایجنڈے میں سرفہرست ہے اور ہم اس پر خصوصی توجہ دے رہے ہیں۔

اس موقع پر انہوں نے وزیراعظم سے درخواست کی کہ اس ساری صورتحال سے نبرد آزما ہونے کیلئے وہ ملک میں تعلیمی ایمرجنسی نافذ کریں۔ وفاقی وزیر تعلیم کے شعبہ میں تعاون کرنے والے تمام غیر ملکی ڈونرز کا بھی شکریہ ادا کیا۔