شہر کے مختلف علاقوں میں ایک منظم گروہ سرگرم ہے جو سیلیکون تھمبز اور سپوفنگ ٹیکنالوجی کے ذریعے لوگوں کو دھوکہ دے کر ان کی جمع پونجی لوٹ رہا ہے۔ یہ گروہ شہریوں کو مفت موبائل سمز، راشن یا دیگر لالچ دیکر انگوٹھے کے نشانات حاصل کرتا ہے اور ان معلومات کو سنگین جرائم میں استعمال کرتا ہے۔
ایف آئی اے سائبر کرائم ملتان سرکل کی ٹیم نے گزشتہ روز مالیاتی دھوکہ دہی میں ملوث دو ملزمان کو گرفتار کیا، جنہوں نے دوران تفتیش سنسنی خیز حقائق کا انکشاف کیا۔ ایڈیشنل ڈائریکٹر عبدالغفار نے ایک ٹی وی پروگرام میں بتایا کہ یہ جعل ساز شہریوں کے بینک اکاؤنٹس تک رسائی حاصل کرکے ان کی رقوم ہتھیا لیتے ہیں۔
انہوں نے خبردار کیا کہ موبائل سمز فراڈ کا مرکزی ذریعہ ہیں، جنہیں یہ گروہ دھوکہ دہی سے حاصل کرتا ہے۔ شہریوں کو مشورہ دیا گیا ہے کہ وہ اپنے فنگر پرنٹس کسی کو فراہم کرتے وقت خاص طور پر محتاط رہیں، کیونکہ یہ نشانات جرائم میں استعمال ہوسکتے ہیں۔
ایف آئی اے کے مطابق یہ کارندے سپوفنگ ٹیکنالوجی کا استعمال کرتے ہوئے خود کو بینک اہلکار، پولیس افسر یا ویزا ایجنٹ ظاہر کرتے ہیں اور کالز کے ذریعے لوگوں کی حساس معلومات جیسے بینک تفصیلات یا شناختی معلومات حاصل کرکے واردات کرتے ہیں۔
عوام کو چاہیے کہ کسی بھی نامعلوم شخص کی پیشکش پر یقین نہ کریں، اور اپنے ذاتی ڈیٹا کو محفوظ رکھیں۔ آپ کی معمولی بے احتیاطی آپ کو مالی نقصان یا قانونی مشکلات میں ڈال سکتی ہے۔ دھوکہ دہی کے ان بڑھتے واقعات کے خلاف عوامی شعور بیدار کرنا وقت کی اہم ضرورت ہے!