کورونا وائرس کے خطرے کے پیشِ نظر متعدد ممالک میں اس وقت لاک ڈاؤن نافذ ہے، دوسری جانب بھارت میں لاک ڈاؤن کے دوران مختلف علاقوں میں عجیب و غریب واقعات رونما ہو رہے ہیں۔
بھارتی ریاست کرناٹک کے رائچور شہر میں بھی مختلف واقعات پیش آ رہے ہیں۔ بعض نامعلوم افراد شہر کے اولڈ نیتا جی نگر علاقے میں 500 روپے کے نوٹ پھینک کر غائب ہوگئے ہیں۔ تین دن قبل اسی طرح کا ایک اور واقعہ رائچور ضلع کے دیورگ ٹاون کے بسویشور علاقے میں پیش آیا تھا۔
مقامی لوگ ان نوٹوں کو ہاتھ لگانے سے گریز کر رہے ہیں اور نوٹ دکھائی دینے کے بعد لوگ فوراً پولیس کو اطلاع دے رہے ہیں۔
بعض لوگوں کا کہنا ہے کہ کورونا وائرس کے سبب پراسرار طور پر ان نوٹوں کو پھینکنا حیرت انگیز اور خطرے کی بات ہے۔
اس بات کی تشویش بھی پائی جا رہی ہے کہ نوٹوں پر کورونا وائرس بھی ہوسکتا ہے۔ اطلاع کے فوری بعد پولیس نے جائے وقوع پہنچ کر مقامی لوگوں سے تفصیلی معلومات طلب کیں اور نوٹوں کو اپنے قبضے میں لے لیا۔
پولیس کو نیتا جی نگر علاقے سے تقریباً ڈھائی ہزار روپے پر مشتمل 500 کے نوٹ ملے ہیں۔ کہا جارہا ہے کہ دستیاب نوٹوں کو ٹیسٹ کیلئے لیبارٹری بھیجا گیا ہے۔ تاہم پراسرار نوٹوں کو لے کر مقامی افراد میں خوف کی لہر پھیل گئی ہے۔