کنگز کپ: الاتحاد فٹبال کلب پر ایک لاکھ 40 ہزار ریال جرمانہ عائد

سعودی عرب میں کھیلے جانے والے کنگز کپ کے سیمی فائنل میں الہلال کلب سے 1-2 گول کی شکست کے بعد الاتحاد کلب پر اس کے کھلاڑیوں اور شائقین کی بدتمیزی پر ایک لاکھ 40 ہزار ریال جرمانہ عائد کیا گیا ہے۔

عرب نیوز کے مطابق سعودی عربین فٹ بال فیڈریشن کی تادیبی اور اخلاقیاتی کمیٹی کے ایک بیان میں کہا گیا ہے کہ اتحاد کلب کے کھلاڑی عبدالرزاق حمداللہ اور سعد الموسیٰ پر میچ کے بعد اپنے فرائض میں غفلت پر تقریباً 5300 ڈالر فی کس جرمانہ ہوا ہے۔

فٹبال فیڈریشن کی تادیبی کمیٹی نے جدہ  کے الاتحاد کلب پر 27 ہزار ڈالر کا جرمانہ بھی عائد کیا جب نظم و ضبط میں کمی کے باعث الاتحاد کلب کے حامی شائقین نے سٹینڈز سے مخالف کھلاڑیوں پر بوتلیں پھینکیں۔

شائقین کی جانب سے کی جانے والی ان حرکات اور واقعات کے نتیجے میں کسی نقصان کی اطلاع نہیں ملی تاہم  ایتھکس کمیٹی نے  کہا ہے کہ جرمانے کے فیصلوں پر اپیل کا حق نہیں۔