عازمین حج میں 40 ملین آب زم زم کی بوتلیں تقسیم کی جائیں گی، الزمازمہ کمپنی

مکہ مکرمہ۔10مئی (اے پی پی):مختلف ممالک سے آنے والے عازمین حج کی رہائشی عمارتوں میں آب زمزم کی فراہمی کو مستقل بنانے کےلیے’’الزمازمہ‘‘ کمپنی کی جانب سے تیاریوں کو حتمی شکل دے دی گئی ہے۔

ایس پی اے کے مطابق اس ضمن میں الزمازمہ کی جانب سے تربیتی ورکشاپس کا انعقاد کیا گیا جس کا مقصد فیلڈ سروس کے معیار کو بہتر بنانا اور عازمین کے مملکت آتے ہی ان کی تواضع آب زم زم سے کرنا ہے۔

کمپنی کے بورڈ کے رکن ڈاکٹر یاسر بن سلیمان شوشو نے بتایا کہ ورکشاپس کے ذریعے کارکنوں کو مکہ شہر کے اندر اور عازمین کی آمد کے پوائنٹس پرتعینات کرنا ہے تاکہ وہ عازمین کا استقبال کرتے ہوئے انہیں آب زم زم کی بوتلیں تقسیم کریں۔

انہوں نے کہا کہ رواں سال ہمارا ہدف ہے کہ عازمین میں حج سیزن کے دوران 40 ملین آب زم زم کی بوتلیں تقسیم کی جائیں اس حساب سے ہر ایک حاجی کو 22 بوتلیں تقسیم کی جائیں گی۔

کمپنی کے دوسرے یونٹ کے ذمہ عازمین کی رہائشی عمارتوں میں آب زم زم کی مستقل بنیاد پرفراہمی کا کام ہوگا جس کی نگرانی کے لیے سپروائزرز تعینات ہوں گے جو اس بات کے ذمہ دار ہوں گے کہ عمارت میں آب زم زم کی فراہمی منقطع نہ ہو۔