ڈسکہ ضمنی انتخابات:(ن)لیگ اور تحریک انصاف میں کانٹےدار مقابلہ جاری،پولنگ شام پانچ بجےتک ہوگی

روزنامہ اوصاف  |  Apr 10, 2021

ڈسکہ (روزنامہ اوصاف)ڈسکہ این اے 75 میں دوبارہ ضمنی انتخاب کے لئے پولنگ کا عمل شام 5 بجے تک جاری رہے گا، پی ٹی آئی کے علی اسجد ملہی اور (ن) لیگ کی نوشین افتخار میں کانٹے کا مقابلہ جاری،نوشین افتخار کے پی ٹی آئی پر جعلی ووٹ ڈالنے کے الزامات بھی سامنے آگئے ،الیکشن کمیشن نے فردوس عاشق اعوان کو حلقے میں ترقیاتی پیکیج کا اعلان کرنے پر شوکاز نوٹس جاری کردیا ،وزیراعلیٰ کی معاون خصوصی سے وضاحت طلب کرلی گئی ۔ الیکشن کمیشن کی جانب سے ضمنی انتخاب میں سکیورٹی کے سخت انتظامات کئے گئے۔ پولنگ سٹیشنز پر پولیس اور رینجرز تعینات ہے جبکہ پاک فوج سٹینڈ بائی رہے گی۔ حلقے میں کل ووٹرز کی تعداد 4 لاکھ 94 ہزار 3 ہے۔ حلقے میں مرد ووٹرز کی تعداد 2 لاکھ 73 ہزار 6 ہے۔ خواتین ووٹرز کی تعداد 2 لاکھ 20 ہزار 997 ہے۔این اے 75 میں 360 پولنگ سٹیشنز قائم کیے گئے ہیں، سیکیورٹی اداروں نے 47 پولنگ سٹیشنز کو انتہائی حساس، 176 کو حساس قرار دیا۔ این اے 75 کے 137 پولنگ سٹیشنز کو سی کیٹیگری میں شامل کیا گیا ہے۔پاکستان مسلم لیگ نون کی امیدوار نوشین افتخار نے گورنمنٹ ڈگری کالج ڈسکہ کا دورہ کیا اور پولنگ کے عمل کی نگرانی کی۔ اس موقع پر ان کا کہنا تھا کہ امید ہے سارا دن ووٹرز کو پر امن ماحول ملے گا اور پولنگ بالکل اسی طرح جاری رہے گی، انتظامیہ عوام کی جان کی حفاظت کریں، عوام بے خوف ہو کر باہر نکلیں اور ووٹ پر پہرہ دیں، ٹرن آوٹ حوصلہ افزاء ہے۔دوسری جانب پاکستان تحریک انصاف کے امیدواد اسجد علی ملہی نے گورنمنٹ گزلر کالج ڈسکہ کے پولنگ سٹیشن کا دورہ کیا۔ اس موقع پر انہوں نے کہا کہ الیکشن میں کئے گئے انتظامات سے مطمئین ہیں، پہلے بھی پی ٹی آئی جیتے تھی اب بھی پی ٹی آئی جیتے گی، پی ٹی آئی آج بھاری اکثریت سے جیتے گی، شام کو جو بھی رزلٹ ہوا وہ ہمیں منظور ہوگا، ن لیگ کی جانب سے دھاندلی کے الزامات ایک ڈرامہ ہے۔صوبائی الیکشن کمشنر پنجاب غلام اسرار خان نے کہا کہ این اے 75 کے تمام پولنگ سٹیشنز میں ضمنی انتخاب کا شفاف انتخابی عمل پر امن طور پر جاری ہے، ووٹرز بلا خوف و خطر اپنے انتخابی حلقوں کے پولنگ سٹیشنز میں ووٹ ڈالنے آئیں، چیف الیکشن کمشنر انتخابی عمل کی خود مانیٹرنگ کر رہے ہیں۔غلام اسرار خان نے مزید کہا کہ متعلقہ اداروں کی طرف سے ضمنی انتخاب کے لئے بہترین انتظامات کیے گئے ہیں، پولنگ سٹیشنز پر رآئے دہندگان کو ہر ممکن سہولیات فراہم کی گئی ہیں، ووٹرز کورونا سے تحفظ کے لیے ایس او پیز کی مکمل پابندی کریں۔ادھرالیکشن کمیشن نے وزیر اعلیٰ پنجاب کی معاون خصوصی فردوس عاشق اعوان کو شوکاز نوٹس جاری کر دیا۔نجی ٹی وی کے مطابق انتخابی ضابطہ اخلاق کی خلاف ورزیوں پر ڈسٹرکٹ مانیٹرنگ آفیسرسیالکوٹ نے فردوس عاشق اعوان کو شوکاز نوٹس جاری کیا۔ڈسٹرکٹ مانیٹرنگ آفیسر سیالکوٹ نے مسلم لیگ ق کے رہنما چوہدری سلیم بریار کو بھی شوکاز نوٹس جاری کیا ہے۔معاون خصوصی فردوس عاشق اعوان نے پریس کانفرنس میں این اے 75 ڈسکہ میں ترقیاتی پیکج کا اعلان کیا تھا۔ جاری کردہ شوکاز نوٹس میں کہا گیا ہے کہ فردوس عاشق اعوان کی جانب سے ترقیاتی پیکج کا اعلان ضابطہ اخلاق کی خلاف ورزی ہے۔ق لیگ کے سینئروائس پریزیڈنٹ چودھری سلیم بریار نے بھی 9 اپریل کو حلقے کا دورہ کیا اور 50 کروڑ روپے کے ترقیاتی پیکج کا اعلان کیا تھا۔ڈسٹرکٹ مانیٹرنگ آفیسر چوہدری سلیم بریار اور فردوس عاشق اعوان کو 2 دن کے اندر جواب داخل کرانے کی ہدایت کی ہے۔
مزید خبریں

Disclaimer: Urduwire.com is only the source of Urdu Meta News (type of Google News) and display news on “as it is” based from leading Urdu news web based sources. If you are a general user or webmaster, and want to know how it works? Read More