پاکستان مسلم لیگ (ن) کے مرکزی رہنماء اور سابق وزیراعظم شاہد خان عباسی نے پی ڈی ایم حکومت پر تنقید کے نشتر برساتے ہوئے حکومت کو ناکام قرار دیدیا۔
اپنے ایک انٹرویو میں شاہد خاقان عباسی نے کہا کہ فوج بھی بیٹھے جج بھی بیٹھیں، ساری زندگی بس ایک دوسرے کو چور کہا، کبھی مل کر بیٹھنے کا نہیں، ہمارا وزیر اعظم 24 گھنٹے بھی کام کرے تو ملک بہتر نہیں کر سکتا۔
انہوں نے کہا کہ ملک کے حالات کو اس نہج پر پہنچانے میں ہم سب ذمہ دار ہیں، سیاسی جماعتوں کے درمیان مسائل پر بات چیت ہونی چاہیے، مسلم لیگ (ن) نے بہت قربانیاں دی ہیں، خرابیوں کے تسلسل کی وجہ سے ملک آج ان حالات کو پہنچا ہے۔
شاہد خاقان عباسی نے کہا کہ ملک کو درپیش مسائل کا حل آئین میں موجود ہے دیکھنا یہ ہے کہ کیا آئین ناکام ہے یا ہم نے خود اسے ناکام کیا، ہمیں سیاسی سیٹ اپ کا رخ تبدیل کر کے عوامی مسائل تک لے کر آنا ہے، الیکشن جب ہوں گے ہم جس جماعت میں ہیں وہیں سے الیکشن لڑیں گے۔
اگر ذمہ داری لگانی ہے تو ٹرتھ کمیشن بنائیں، نواز شریف کے ساتھ ناانصافیوں کا ازالہ ہونا چاہیے، ہم نے غیر جماعتی بنیاد پر بات کی ہے، بنیادی خرابیوں کے نتائج 8 ماہ میں دور نہیں کر سکتے۔
انہوں نے کہا کہ جب سیاست دشمنی میں بدل جائےتو حالات تباہی کی طرف ہی جاتے ہیں، میری پارٹی کی حکومت ہوسکتی ہے لیکن میں حکومت کا حصہ نہیں ہوں، چیف جسٹس، آرمی چیف اور وزیراعظم سب کو ایک جگہ جمع کریں اور مسائل کا حل نکالیں۔
افسوس کی بات ہے کہ ہم الیکشن کرواکر بھی معاملات کو حل نہیں کرسکتے، میرے نزدیک تمام مسائل کا حل صرف سیاستدانوں کے اتفاق میں ہے، وزیراعظم کو تمام جماعتوں کا ایک جگہ جمع کرنا چاہیے۔ ملکی معاملات میں لاپرواہی انتہائی تشویشناک ہے، صورتحال بگڑتی جارہی ہے۔
یاد رہے کہ شاہد خاقان عباسی کی جانب سے ملکی مسائل کے حل کیلئے تمام اسٹیک ہولڈرز کو ایک جگہ جمع کرنے کی تجویز پیش کی گئی تاہم اپنی پارٹی سے بغاوت اور پی ٹی آئی میں شمولیت کے حوالے سے افواہوں میں کوئی صداقت نہیں ہے۔