لوگوں کو پہلے امیر کرو پھر ٹیکس لگاؤ، میثاق معیشت کیا جائے، زرداری

لاہور: پاکستان پیپلز پارٹی (پی پی پی) کے شریک چیئرمین آصف علی زرداری نے کہا ہے کہ لوگوں کو پہلے امیر کرو پھر ان پر ٹیکس لگاؤ، پنجاب کے بڑے بزنس مین اکٹھے ہوجائیں میں سرمایہ کاری کی گارنٹی دیتا ہوں۔

انہوں نے فیڈریشن آف پاکستان چیمبرز آف کامرس اینڈ انڈسٹری (آف ایف پی سی سی آئی) کی تقریب سے خطاب کرتے ہوئے کہا پیپلز پارٹی نے ہمیشہ تاجر برادری کا خیال رکھا ہے، معیشت کی بہتری ہماری آنے والی نسلوں کیلئے ضروری ہے، پاکستان میں اب بھی آگے جانے کی صلاحیت ہے، ملک میں پبلک پرائیویٹ پارٹنرشپ کے فروغ کی ضرورت ہے۔

سابق صدر پاکستان آصف زرداری نے کہا کہ 70 سال سے گوادر ہے، کسی کو نظر نہیں آرہا تھا، معیشت پانچ، دس سال کیلئے نہیں نسلوں کیلئے بنانی پڑتی ہے، میثاق معیشت پر بات کرنے کی ضرورت ہے۔ انہوں نے کہا کہ میں گھر سے زیادہ جیل میں رہا ہوں۔

انہوں نے کہا کہ ایکسپورٹ بڑھنے سے مسائل حل ہوتے ہیں، غیر ملکی سرمایہ کار پیسہ لگاتا ہے تو پیسہ لے کر بھی جاتا ہے۔

آصف زرداری نے کہا ہمارے پاس افرادی قوت کے ساتھ ساتھ سب کچھ ہے، مائنڈ سیٹ سے نکل کر معیشت پر کام کرنے کی ضرورت ہے، اصل بات یہ ہے کہ میثاق معیشت کیا جائے، چارٹر آف اکانومی پر بات کرنے کی ضرورت ہے۔

انہوں نے ملک میں پبلک پرائیویٹ پارٹنرشپ کے فروغ کی ضرورت پر زور دیتے ہوئے کہا چین کا معاشی منصوبہ آئندہ 50 سال کیلئے ہے، معاشی منصوبہ بندی چند دنوں کیلئے نہیں سالوں کیلئے ہوتی ہے۔

وفاقی بجٹ کا حجم 14 ہزار 600 ارب روپے متوقع

سابق صدر پاکستان آصف زرداری نے کہا میں نے جو ریٹ ایران سے لے کر دیا وہ کہیں سے اور نہیں ملے گا، یہاں اگر قطر سے مہنگی گیس آئے گی تو مہنگی بیچی بھی جائے گی، ماضی کی حکومتوں کو چارٹر آف اکانومی پر کام کرنے کا کہا تھا۔