مہنگے بلوں سے پریشان عوام کے لئے خوشخبری۔۔ فی یونٹ بجلی کی قیمت کتنی کم کی جارہی ہے اور اطلاق کب سے ہوگا؟

اے آر وائی نیوز کے مطابق، وفاقی وزیر اویس لغاری نے اعلان کیا ہے کہ آئندہ چند ماہ میں بجلی کی قیمتیں 10 روپے فی یونٹ تک کم ہو جائیں گی، اور ایسا ہونا ضروری ہے تاکہ ملکی صنعت کو فروغ ملے۔ ان کا کہنا ہے کہ پچھلے چھ ماہ سے حکومت بجلی کی قیمتیں کم کرنے پر کام کر رہی ہے۔

اویس لغاری نے بتایا کہ پانچ آئی پی پیز کے ساتھ حال ہی میں ایک معاہدہ طے پایا ہے، جس سے حکومت اور عوام کو 411 ارب روپے کی بچت ہوئی ہے۔ انہوں نے تمام متعلقہ اداروں، خاص طور پر آرمی چیف کا شکریہ ادا کیا۔

انہوں نے مزید کہا کہ اگر کراچی واقعہ نہ ہوتا تو دو ہفتے کے اندر کئی اہم معاہدے طے پا چکے ہوتے۔ وزیراعظم شہباز شریف نے بھی وفاقی کابینہ کے اجلاس میں اس بات کا انکشاف کیا کہ پانچ آئی پی پیز کے ساتھ "ٹیک اینڈ پے" معاہدے ختم کر دیے گئے ہیں۔ اس اقدام سے صارفین کو سالانہ 60 ارب روپے اور ملکی خزانے کو 411 ارب روپے کی بچت ہوگی۔

شہباز شریف نے بتایا کہ پانچ آئی پی پیز کے مالکان نے قومی مفاد میں اپنے ذاتی مفاد کو قربان کرتے ہوئے خوشدلی سے یہ معاہدے ختم کر دیے ہیں۔ یہ تو ابھی آغاز ہے، آنے والے دنوں میں مزید آئی پی پیز سے بات چیت ہو گی اور معاہدوں پر نظرثانی کرتے ہوئے بجلی کے نرخ میں مزید کمی لائی جائے گی۔