بھارتی معروف اداکارہ کرینہ کپور خان نے حال ہی میں انکشاف کیا کہ پہلے بیٹے کی پیدائش پر وہ ڈپریشن کا شکار ہوگئی تھیں۔
کرینہ کپور اور سیف علی خان نے دسمبر 2016 میں اپنے پہلے بیٹے کو دنیا میں خوش آمدید کہا اور اس کا نام تیمور علی خان رکھا۔
بیٹے کا نام مغل بادشاہ تیمور کی نسبت پر رکھے جانے کے باعث بھارت میں ایک اُدھم برپا ہوگیا تھا، ننھے تیمور کا خیر مقدم کرنے کے بجائے ملک بھر میں نام کو تبدیل کروانے کے سلسلے میں احتجاج شروع ہوگئے۔
حال ہی میں بھارتی میڈیا کو دیئے گئے ایک انٹرویو میں کرینہ کپور نے انکشاف کیا کہ، شادی کے بعد بیٹے تیمور کے نام پر کھڑے ہونے والے تنازع کی وجہ سے وہ ڈپریشن کا شکار ہوگئی تھیں۔
ان کا کہنا تھا کہ، تیمور کے نام پر ہونے والے ڈرامے نے انہیں ذہنی طور پر کافی متاثر کیا۔ میں یہ سوچتی تھی کہ لوگ میرے بیٹے کے نام کے بارے میں اتنی بات کیوں کر رہے تھے؟ اور جب بیٹے کی جانب دیکھتی تھی تو سوچتی تھی کہ جس کیلئے اتنا ڈرامہ کیا جارہا ہے اسے تو معلوم بھی نہیں ہے کہ محض اس کے نام پر باہر ایک ہنگامہ برپا ہوگیا ہے۔
کرینہ کا کہنا تھا کہ، آج لوگ وہ ساری باتیں بھول گئے اور تیمور کے نام کو قبول کرتے ہوئے اسے بے تحاشہ پیار بھی کرنے لگے، جس سے میں مطمئن ہوں۔