ملکی وے کہکشاں میں واضح بلیک ہول کی نئی تصویر جاری

ماہرینِ فلکیات کی جانب سے ملکی وے کہکشاں کے درمیان میں موجود بلیک ہول کی نئی حیرت انگیز تصویر جاری کر دی گئی۔

سیگیٹیریس اے* نامی یہ جرم پہلی بار پولرائزڈ روشنی میں دیکھا گیا، جسے ایک اہم کامیابی قرار دیا جا رہا ہے۔

مذکورہ تصویر میں ملکی وے کہکشاں کے مرکز میں موجود بڑے حجم والے بلیک ہول کے متعلق نیا نقطہ نظر پیش کیا گیا ہے۔

تصویر میں بلیک ہول کے گرد ایک مقناطیسی فیلڈ اسٹرکچر دیکھا جا سکتا ہے جو بتاتا ہے کہ اس میں ایک جیٹ (گیس اور توانائی کی اسٹریم) پوشیدہ ہوسکتی ہے۔

یہ تصویر ایونٹ ہورائزن ٹیلی اسکوپ کے سائنس دانوں نے تشکیل دی ہے۔ اس ٹیم نے میسیئر 87 کہکشاں کے مرکز میں موجود ایک بلیک ہول کی پہلی تصویر بنائی تھی۔

ہماری کہکشاں ملکی وے میسیئر 87 سے ہزاروں گنا چھوٹی کہکشاں ہے لیکن یہ نئی تصویر بتاتی ہے کہ دونوں بلیک ہول ایک دوسرے سے مشابہت رکھتے ہیں اور دونوں کے مقناطیسی فیلڈ اسٹرکچر بھی ایک جیسے ہیں جس سے معلوم ہوتا ہے کہ تمام بلیک ہول ایک ہی طرح کام کرتے ہیں۔