کوبرا کے ساتھ 40 منٹ تک لڑائی، کتے نے اپنی جان دے کر فیملی کو بچا لیا

انڈین ریاست کرناٹک میں بھیما نامی پِٹ بُل کتے نے کنگ کوبرا سانپ سے ایک خاندان کو اس وقت بچایا جب وہ ان پر حملہ کرنے والا تھا۔

ٹائمز آف اںڈیا کے مطابق کتا 40 منٹ تک سانپ سے لڑتا رہا اور مرنے سے پہلے 12 فٹ لمبے سانپ کے 11 ٹکڑے کیے۔

یہ واقعہ انجینیئر سمانتھ گوڑا کے فارم ہاؤس سے رپورٹ ہوا جن کی کٹایا گاؤں میں فیئر پرائس شاپ ہے۔ بدھ کی دوپہر سانپ نے مرغیوں کے فارم میں گھسنے کی کوشش کی جہاں کچھ مزدور تھے اور ان کے بچے قریب ہی کھیل رہے تھے۔

ایک دوسرے ڈوبرمین کتے نے سانپ کو دیکھ کر اس پر حملہ کیا اور بھیما نے بھی سانپ کو دیکھ لیا۔

فارم کے مالک نے کہا کہ ’سانپوں سے لڑنا بھیما کے لیے نئی بات نہیں تھی کیونکہ وہ اس سے پہلے 15 سانپ مار چکا تھا۔ وہ اتنا طاقتور تھا کہ چیتوں کو بھی قریب پھٹکنے نہیں دیتا تھا۔‘

انہوں نے بتایا کہ ’لڑائی شروع ہوتے ہی سانپ نے کتے کو ناک کے قریب کاٹ لیا تھا لیکن وہ لڑتا رہا۔ تقریباً 40 منٹ تک لڑائی جاری رہی اور اس نے سانپ کے 11 ٹکڑے کیے۔‘

ان کا کہنا تھا کہ ’جب وہ بچہ تھا تو میں اسے اپنے دوست کے گھر سے لایا تھا۔ ہم نے اسے فارم کے قریب ہی دفنا دیا۔‘