بالی ووڈ کے تینوں خانز کو پیچھے چھوڑ کر رونی اسکریو والا نے فوربس کی ارب پتیوں کی فہرست میں جگہ بنا لی۔
فوربس نے ارب پتیوں کی نئی فہرست جاری کی ہے، جس میں 3,028 ارب پتیوں کے نام شامل ہیں۔ حیران کن طور پر اس فہرست میں بالی ووڈ کے کسی بھی بڑے سپر اسٹار جیسے شاہ رخ خان، سلمان خان یا عامر خان کا نام شامل نہیں، بلکہ بالی ووڈ کے معروف فلم پروڈیوسر اور کاروباری شخصیت رونی اسکریو والا نے اپنی جگہ بنا لی۔
فوربس کے مطابق رونی اسکریو والا کی کل دولت 1.5 ارب ڈالرز (تقریباً 112.5 ارب روپے) ہے، جو بالی ووڈ کے تینوں خانز کی مجموعی دولت سے بھی زیادہ ہے۔ شاہ رخ خان کی مجموعی دولت 770 ملین ڈالرز، سلمان خان کی 390 ملین ڈالرز اور عامر خان کی 220 ملین ڈالرز ہے جبکہ تینوں کی مجموعی دولت 1.38 ارب ڈالرز ہے۔
رونی اسکریو والا کا تعلق ممبئی سے ہے اور انہوں نے اپنے کاروباری سفر کا آغاز 1970ء کی دہائی میں ٹوتھ برش بنانے سے کیا تھا۔ 1990ء میں انہوں نے UTV کی بنیاد رکھی، جو بعد میں UTV Motion Pictures کے نام سے جانی گئی۔
کمپنی نے کئی مشہور فلمیں اور ٹی وی شوز بنائے جن میں جودھا اکبر، فیشن، دہلی بیلی، برفی، رنگ دے بسنتی، کھوسلہ کا گھوسلہ، شانتی، ہپ ہپ ہُرے، شاکا لکا بوم بوم، کھچڑی اور شرارت شامل ہیں۔