جون 2024 میں ملک بھر کی توجہ کا مرکز بننے والے معروف صنعت کار مزمل پراچہ اب دنیا میں نہیں رہے۔ وہ کچھ عرصے سے کینسر جیسے مہلک مرض سے نبرد آزما تھے اور دبئی میں زیر علاج تھے، جہاں اب ان کے انتقال کی خبر سامنے آئی ہے۔
مزمل پراچہ نے سندھ حکومت کی جانب سے نیلام کی گئی منفرد اور نایاب نمبر پلیٹس میں سے سب سے مہنگی ’A-1‘ نمبر پلیٹ 10 کروڑ روپے میں خریدی تھی۔ ان کی اس خریداری نے سوشل میڈیا پر خاصی ہلچل مچا دی تھی، اور اُن کی تصاویر اور ویڈیوز کئی دن تک زیرِ بحث رہیں۔
یہ پلیٹ صرف ایک نمبر نہیں تھی، بلکہ اُس شان، شخصیت اور اثرورسوخ کی علامت سمجھی گئی جس کا اظہار مزمل پراچہ نے کیا۔ ان کی یہ پہچان مختصر وقت میں ملک بھر میں مشہور ہوگئی تھی۔
ان کے انتقال کی خبر کے بعد سوشل میڈیا پر گہرے دکھ کا اظہار کیا جا رہا ہے۔ صارفین مرحوم کے لیے دعائے مغفرت کر رہے ہیں، اور ان کی زندگی کی جدوجہد، کامیابی اور بیماری سے لڑنے کے حوصلے کو خراجِ تحسین پیش کر رہے ہیں۔