بائیو سیکیور کی خلاف ورزی، محمد حفیظ کو آئسولیشن میں بھیجنے کا فیصلہ

نوائے وقت  |  Aug 13, 2020

قومی کرکٹ ٹیم کے آل راؤنڈر محمد حفیظ کو خاتون کے ساتھ تصویر بنانا مہنگا پڑگیا اور وہ بائیو سیکیور پروٹوکول کی خلاف ورزی کی زد میں آگئے ہیں۔

دورہ انگلینڈ پر گئے محمد حفیظ ساؤتھمپٹن میں گالف کھیلنے گئے تھے جہاں نوے سالہ خاتون کے ساتھ تصویر بنوائی اور سوشل میڈیا پر شیئر کردی۔

پاکستان کرکٹ بورڈ کے مطابق بائیوسیکیور پروٹوکول کی خلاف ورزی پر محمد حفیظ کا کورونا ٹیسٹ کیلئے سیمپل لے لیا گیا ہے اور نتائج آنے تک قومی کرکٹر کو آئیسولیشن میں رکھا جائے گا۔

پاکستان کرکٹ بورڈ (پی سی بی) نے محمد حفیظ کے معاملے پر انگلش بورڈ سے رابطہ کرلیا ہے اور کہا ہے کہ گالف کورس بائیو سیکیور ببل کا حصہ ہے اور گراؤنڈ سے ہی ملحقہ ہے جبکہ یہاں کھلاڑیوں کے آنے جانے پر بھی کوئی پابندی نہیں، اگلے چند گھنٹوں میں حقائق سامنے لائے جائیں گے۔

واضح رہے کہ کورونا وائرس کے باعث پاکستان اور انگلینڈ کی سیریز بائیو سیکیور ماحول اور سخت حفاظتی پروٹوکول میں ہو رہی ہے اور ابھی سیریز کا ایک ٹیسٹ میچ کھیلا گیا ہے جبکہ دو ٹیسٹ میچز کے علاوہ تین ٹی 20 میچز پر مشتمل سیریز بھی باقی ہے۔

محمد حفیظ نے خاتون سے 2 میٹرکا فاصلہ نہ رکھ کرپروٹوکول کی خلاف ورزی کی ہے اور انگلینڈ نے اسی طرح کی خلاف ورزی پر اپنے کھلاڑی جوفرا آرچرڈ پر پابندی اور جرمانہ عائد کیا تھا۔

مزید خبریں

Disclaimer: Urduwire.com is only the source of Urdu Meta News (type of Google News) and display news on “as it is” based from leading Urdu news web based sources. If you are a general user or webmaster, and want to know how it works? Read More