پی سی بی اور پی ٹی وی کے درمیان تین سالہ معاہدے پر دستخط

بول نیوز  |  Sep 16, 2020

 پاکستان کرکٹ بورڈ (پی سی بی) اور پاکستان ٹیلی ویژن (پی ٹی وی اسپورٹس )کے درمیان تین سالہ معاہدے پر دستخط ہوگئے۔

تفصیلات کے مطابق  سال 2023 تک جاری رہنے والے اس معاہدے کی پہلی اسائنمنٹ نیشنل ٹی ٹوئنٹی کپ ہوگی۔30 ستمبر سے شروع ہونے والے ٹورنامنٹ کی پراڈکشن پی سی بی اور براڈکاسٹنگ پی ٹی وی کرے گا۔

چیئر مین پی سی بی احسان مانی کا کہنا ہے کہ  معاہدے کو حتمی شکل دینے پر پی ٹی وی اور آئی میڈیا کیمونیکشن سروسز کو مبارکباد پیش کرتے ہیں۔ یہ پاکستان کرکٹ کی تاریخ کی سب سے بڑی براڈکاسٹنگ ڈیل ہے۔

احسان مانی کا کہنا ہے کہ  تین سالہ معاہدے سے پاکستان کی کرکٹ پر بہت مثبت اثرات مرتب ہوں گے۔

انہوں نے کہا کہ پی سی بی آئندہ تین سال میں قومی مینز اور ویمنز کرکٹ کے فروغ پر 15 بلین روپے خرچ کرے گا۔ یہ رقم ہائی پرفارمنس سینٹرز میں سابق کرکٹرز کے لیے روزگار کے مواقع پیدا کرنے پر بھی خرچ ہوگی۔

خیال رہے کہ  تین سالہ براڈکاسٹ معاہدے کو حتمی شکل دینے میں چیئرمین پی سی بی احسان مانی کا اہم کردار رہا ۔ احسان مانی گزشتہ 4 ماہ سے اس ڈیل پر کام کر رہے تھے۔

احسان مانی اس سے قبل آئی سی سی اور پی سی بی کو منافع بخش براڈکاسٹ ڈیل کرانے میں شہرت رکھتے ہیں۔

یہاں یہ بات قابل ذکر ہے کہ اس معاہدے کے بعد پاکستان کرکٹ بورڈ کا بھارتی براڈکاسٹرز پر انحصار ختم ہوجائے گا۔ گذشتہ تین سالہ براڈکاسٹ ڈیل سے پی سی بی کو 60 ملین امریکی ڈالر کی آمدن ہوئی تھی۔

دوسری جانب اس گیم چینجر معاہدے سے پی سی بی کو 200 ملین امریکی ڈالر کی آمدن متوقع ہے۔

مزید خبریں

Disclaimer: Urduwire.com is only the source of Urdu Meta News (type of Google News) and display news on “as it is” based from leading Urdu news web based sources. If you are a general user or webmaster, and want to know how it works? Read More