حکومت کی مقبولیت صفر ہو چکی ہے، سربراہ پی ڈی ایم مولانا فضل الرحمان

سچ ٹی وی  |  Oct 23, 2020

خضدار جمعیت علمائے اسلام (ف) کے سربراہ مولانا فضل الرحمان نے کہا ہے کہ یہ حکومت چوری کے ووٹوں سےعوام پرمسلط ہوئی ہے۔

خضدار میں جلسہ عام سے خطاب میں انہوں نے حکومت کو تنقید کا نشانہ بناتے ہوئے کہا کہ عوام میں حکومت کی مقبولیت صفر ہو چکی ہے۔

انہوں نے کہا کہ باقی جلسوں کی طرح کوئٹہ کا جلسہ بھی کامیاب ہو گا، 25 اکتوبر کے جلسہ میں عوام بھرپور شرکت کریں گے۔

یاد رہے کہ گزشتہ روز لاڑکانہ میں پریس کانفرنس کرتے ہوئے مولانا فضل الرحمان نے کہا تھا کہ صورتحال ایسی نہیں کہ قومی احتساب بیورو (نیب) کو برداشت کیا جا سکے۔

انہوں نے کہا کہ پورے ملک میں اضطراب اور بے چینی کی صورتحال ہے اور ملک میں کوئی حکومت نہیں سارا انتظامی ڈھانچہ ہی بکھرا ہوا ہے۔

ان کا کہنا تھا کہ صورتحال ایسی نہیں کہ نیب کو برداشت کیا جا سکے اور اب ہم جیلوں کی طرف رخ موڑنے کو تیار ہیں۔ ہم پوری قوم کے جمہوری حق کی جنگ لڑ رہے ہیں جب کہ اوچھے ہتکھنڈے استعمال کرنے سے ملک میں انتشار پھیلے گا۔

مولانا فضل الرحمان نے کہا کہ کراچی واقعہ پر وفاق بری الزمہ نہیں ہو سکتا جبکہ سندھ پولیس کا ردعمل اس بات کی نشاندہی ہے کہ پانی سر سے گزر چکا ہے۔ اب کراچی واقعے پر وفاق فرار حاصل نہیں کر سکتا۔

انہوں نے کہا کہ حکمرانوں کی نااہلی سے ملکی معیشت تباہ ہوئی اب ہم اس کی بحالی کی جنگ لڑ رہے ہیں۔

سربراہ پی ڈی ایم نے کہا کہ حکومت اگر ہمیں سیکیورٹی نہیں دے سکتی تو ہمیں اجازت دے اپنی سیکیورٹی کا انتظام ہم خود کر لیں گے۔ پی ڈی ایم کے پلیٹ فارم پر تمام جماعتیں متحد ہیں جبکہ اداروں کی حکومتی معاملات میں مداخلت نہیں ہونی چاہیے۔

مزید خبریں

Disclaimer: Urduwire.com is only the source of Urdu Meta News (type of Google News) and display news on “as it is” based from leading Urdu news web based sources. If you are a general user or webmaster, and want to know how it works? Read More