سعودی عرب میں میڈیکل انشورنس کے بغیر اب فیملی وزٹ ویزے میں توسیع نہیں ہو سکے گی، کونسل آف کوآپریٹو ہیلتھ انشورنس فیصلہ۔
عرب میڈیا کے مطابق سعودی عرب میں کونسل آف کوآپریٹو ہیلتھ انشورنس کا کہنا ہے کہ وزٹ ویزے میں توسیع موثر میڈیکل انشورنس کے بغیر نہیں ہو سکتی۔
کونسل آف کوآپریٹو ہیلتھ انشورنس نے ہدایات جاری کیں ہیں کہ ہیلتھ انشورنس سکیم کو محکمہ پاسپورٹ سے بھی منسلک کرنا ہوگا، اس کے بغیر ویزے میں توسیع نہیں ہو گی۔
سعودی عرب میں وزٹ ویزے چھ ماہ سے ایک برس تک کے لئے جاری ہوتے ہیں، بنیادی طور پر وزٹ ویزے کا دورانیہ تین ماہ کا ہوتا ہے، تاہم اس میں بعد ازاں تین ماہ کی مزید توسیع کی جاتی ہے۔
جبکہ ملٹی پل وزٹ ویزا ایک برس کے لیے ہوتا ہے اس کے لیے لازمی ہے کہ چھ ماہ کے بعد وزٹ پر آنے والے افراد مملکت سے باہر جائیں اور دوبارہ انٹری دیں اس کے لیے لازمی نہیں کہ وہ اپنے ملک ہی جائیں بلکہ قریبی ملک بھی جایا جا سکتا ہے۔
خیال رہے کہ سعودی عرب میں وزٹ ویزے دو طرح کے ہوتے ہیں جن میں فیملی وزٹ اور بزنس وزٹ ویزا شامل ہے۔
فیملی وزٹ سے مراد اہل خانہ ہیں جن میں اہلیہ، بچے، والدین اور اہلیہ کی والدہ شامل ہیں جبکہ کاروباری افراد کے لیے عارضی بنیاد پر بزنس وزٹ ویزے کا اجرا ء کیا جاتا ہے۔
ویزے کی میعاد ختم ہونے سے سات روز قبل فیملی وزٹ ویزے اور بزنس وزٹ ویزے میں ابشر ایپ کے ذریعے توسیع ہو سکتی ہے۔
تاہم توسیع کے لیے پہلی شرط مطلوبہ فیس کی ادائیگی ہے جبکہ اب ایک اور نئی شرط موثر میڈیکل انشورنس ہے۔