سندھ حکومت کراچی کے تمام شہریوں کو یکساں سہولیات فراہم کرنا چاہتی ہے، سعید غنی

بول نیوز  |  Apr 16, 2021

صوبائی وزیر اور پیپلز پارٹی کے سینئر رہنما سعید غنی نے کہا ہے کہ سندھ حکومت کراچی کے تمام شہریوں کو فراہمی و نکاسی آب کی یکساں سہولیا ت فراہم کرنا چاہتی ہے۔

تفصیلات کے مطابق صوبائی وزیر اور پیپلز پارٹی کے سینئر رہنما سعید غنی نے واٹر بورڈ کے ایم ڈی سیکریٹریٹ میں منعقدہ اجلاس سے خطا ب کرتے ہوئے کہا کہ کراچی کے شہریوں میں دستیاب پانی کی نلوں و لائنوں کے ذریعے منصفانہ تقسیم کیلئے تمام ممکنہ اقدامات اٹھائے جائیں گے۔

اجلاس کے دوران ایم ڈی واٹر بورڈ اسداللہ خان نے صوبائی وزیر کو رمضان المبارک میں فراہمی و نکاسی آب کے لئے واٹربورڈ کے خصوصی اقدامات سے آگاہ کیا۔

ایم ڈی واٹر بورڈ نے کہا کہ شہر میں پانی کی منصفانہ تقسیم کیلئے سسٹم پہلے ہی نافذ ہے جبکہ پانی کے ضیاع کو روکنے اور اس پانی کو بھی شہریوں تک پہنچانے کیلئے شہر میں بچھی لائنوں، فلٹرپلانٹس، پمپنگ اسٹیشنوں کی صفائی و مرمت فوری طور پر کی جاتی ہے۔

اسداللہ خان نے یہ بھی کہا کہ واٹربورڈ کا عملہ شہر میں قائم واٹر و سیوریج پمپنگ اسٹیشنوں کو سال بھر بغیر کسی وقفہ رواں رکھنے کیلئے مختلف شفٹوں میں 24گھنٹے کام کرتا ہے،نکاسی آب کے نظام کو چلانے اور اس ضمن میں شکایات کے ازالے کیلئے دن کے ساتھ ساتھ رات کے مختلف پہر بھی واٹربورڈ متحرک رہتا ہے۔

ایم ڈی واٹر بورڈ اسداللہ خان نے مزید کہا کہ کراچی کی بڑھتی آبادی اور شہر کی ضرورت سے کافی کم پانی کی دستیابی سے مسائل جنم لیتے ہیں تاہم بہترین حکمت عملی ومنصوبہ بندی کے ذریعہ واٹربورڈ کے ماہرین، انجینئرز وافسران ان مسائل سے نمبرد آزما ہیں۔

اس موقع پر صوبائی وزیر اور پیپلز پارٹی کے سینئر رہنما سعید غنی نے کہا کہ سندھ حکومت کراچی کے تمام شہریوں کو فراہمی ونکاسی آب کی یکساں سہولیات فراہم کرنا چاہتی ہے، اس ضمن میں سندھ حکومت اور وزیربلدیات کے اقدامات قابل ستائش ہیں۔

پیپلز پارٹی کے سینئر رہنما کا کہنا تھا کہ حکومت سندھ نے واٹربورڈ اور اس کے ملازمین کوکبھی کسی مشکل وقت میں تنہا نہیں چھوڑا، ادارے کے تمام ملازمین کو قواعد کے مطابق حاصل حقوق دیئے جارہے ہیں۔

سعید غنی نے کہا کہ صوبائی حکومت کی جانب سے شہر میں نکاسی آب کے نظام کو درست کرنے کیلئے بھی واٹربورڈ کو ضروری ہدایات جاری کردی گئی ہیں۔

صوبائی وزیر اور پیپلز پارٹی کے سینئر رہنما سعید غنی نے مزید کہا کہ شہریوں کورمضان المبارک کے دوران دستیاب پانی کی منصفانہ تقسیم کیلئے ہرممکن اقدامات کئے جائیں۔

اجلاس میں پی پی کے رہنما فرحان غنی،احمد علی واٹربورڈ کے چیف انجینئر ، سپرنٹنڈنگ انجینئر روشن دین،محمد ریاض، ایگزیکٹیو انجینئر اعجاز احمد، عمران عبداللہ، عرفان اللہ، صدیق تونیو، عزیز اللہ اور دیگر بھی موجود تھے۔

-->
مزید خبریں

Disclaimer: Urduwire.com is only the source of Urdu Meta News (type of Google News) and display news on “as it is” based from leading Urdu news web based sources. If you are a general user or webmaster, and want to know how it works? Read More