جانوروں کی خوراک: جنوبی افریقہ میں مکھیوں کو پالتو جانوروں کی خوراک کے لیے استعمال کرنے کا منفرد تجربہ

بی بی سی اردو  |  Sep 20, 2021

Flies in a mesh
Tommy Trenchard

پالتو جانوروں کے کھانے میں پروٹین کےلیے کیڑوں کی مانگ بڑھ رہی ہے۔ فوٹوگرافر ٹومی ٹرینچارڈ نے جنوبی افریقہ کے شہر کیپ ٹاؤن میں مکھیوں کے ایک فارم کا دورہ کیا جس کے ذریعے اس مانگ کو پورا کیے جانے کی کافی امید ہے۔

تاہم شہر کے کنارے ایک صنعتی خطے پر سنہ 2018 میں شروع کیا گیا مالٹنٹو فارم اپنے روایتی دیہی فارم کی نسبت ابھی اس منزل سے کافی دور نظر آتا ہے۔

پھر بھی ہر مہینے یہ 10 ٹن سے زیادہ اعلیٰ معیار کی پروٹین سے بھرپور غذا تیار کرتا ہے، اس میں سے زیادہ حصہ بیرون ملک برآمد ہو رہا ہے۔

ڈین سمورین برگ کہتے ہیں کہ 'آپ کے ہاں خوراک کی کمی ہے، اور لوگ بھوک سے مر رہے ہیں۔ اس کے ساتھ ساتھ آپ کو فضلہ جمع کر کے اسے ٹھکانے لگانے کا مسئلہ بھی درپیش ہے۔

’لہٰذا میں نے یہ دیکھنا شروع کیا کہ ہم اس سارے مسئلے میں توازن کیسے پیدا کر سکتے ہیں۔‘

اس فارم کے بانی ڈین سمورین برگ بتاتے ہیں کہ انھیں یہ منصوبہ شروع کرنے کی ضرورت کیوں محسوس ہوئی۔ وہ ایک سابق مینجمنٹ کنسلٹنٹ ہیں جنھوں نے کاروبار میں کل وقتی طور پر داخل ہونے سے پہلے سنہ 2016 میں اپنے باتھ روم میں مکھیوں کی خاص قسم، ’سیاہ سپاہی مکھیوں‘ کو پالنا شروع کیا تھا۔

کاربن کے نقصانات کے بارے میں حساس صارفین کے لیے مکھیاں پالنے کا یہ ماڈل پرکشش ہے۔

مکھی کے لاروا ہمارے کھانے کی ضائع شدہ اشیا پر پلتے ہیں۔ اس صورت میں بنیادی طور پر اس کے لیے شراب خانے کے اناج کو استعمال کیا جاتا ہے، یہ اسے اس معیار کے پروٹین میں تبدیل کر دیتے ہیں جسے فروخت کیا جا سکتا ہے اور ساتھ ساتھ بائی پروڈکٹ کے طور پر اس سے کھاد بھی بن جاتی ہے۔

یہ عمل پروٹین کی پیداوار کی دیگر اقسام کے مقابلے میں نمایاں طور پر کم پانی اور کم زمین استعمال کرتا ہے اور اس سے بہت کم کاربن پیدا ہوتی ہے۔

برطانیہ اور جرمنی کے محققین کو سنہ 2020 کی ایک تحقیق سے معلوم ہوا ہے کہ پالتو جانوروں کی خوراک کی عالمی مارکیٹ فلپائن یا موزمبیق کے کُل اخراج کی جتنی کاربن ڈائی آکسائیڈ کا فضا میں اخراج کرتی ہے۔

دنیا میں بڑے پیمانے پر سستے پروٹین مہیا کرنے والی سویا یا ماہی گیری کی عالمی صنعتوں کا براہ راست مقابلہ کرنے کے بجائے مالٹنٹو فارم ایسی مصنوعات پیش کرنے کی کوشش کر رہا ہے جو پالتو جانوروں کے کھانے کے ذائقے یا غذائیت کی خصوصیات اور ضروریات کو پورا کرتی ہیں۔

سمورین برگ کا کہنا ہے کہ 'کیڑوں کی حیثیت ایک پروٹین کے ذریعے سے کہیں زیادہ اہم ہے۔

'اور دنیا میں کوئی دوسری فصل نہیں ہے جو آپ کو ایک جگہ سے سالانہ 52 فصلیں دے سکے۔'

تیزی سے پھیلنے والے مالٹنٹو فارم کو کیڑوں کی زندگی کے مختلف مراحل کے مطابق حصوں میں تقسیم کیا گیا ہے۔

ان کا پیوپا فارم کے گراؤنڈ فلور پر ایک تاریک کمرے میں اپنی تبدیلی کے عمل سے گزرتا ہے اس سے پہلے کہ انھیں اوپر کی طرف ایک بریڈنگ انکلوژر میں منتقل کیا جائے، جہاں وائلٹ روشنی کے نیچے بالغ مکھیاں میش پنجروں میں انڈے دیتی ہیں۔

ممکنہ صارفین کی تعداد بڑھانے کے ذمہ دار ڈومینک مالان کہتے ہیں کہ 'یہ بنیادی طور پر فارم کا انجن روم ہے، یہاں درجہ حرارت اور نمی ان کی نشو و نما کو یقینی بنانے کے لیے سب سے اہم چیزیں ہیں۔'

یہ بھی پڑھیے

خاتون کی آنکھ سے چار زندہ مکھیاں برآمد

شہد کی مکھیاں قاتل بِھڑوں سے بچنے کے لیے کیا انوکھا کام کرتی ہیں؟

شہد کی مکھیوں کی ’ملکہ ترنم‘

’روشنیوں کا شہر مکھیوں کے شہر میں بدل چکا ہے‘

اگلے دروازے پر نرسری میں انڈے 'نوزائیدہ' میں تبدیل ہوتے ہیں جو پلاسٹک کے چھوٹے کنٹینروں میں تقسیم ہوتے ہیں۔ یہ پھر مخصوص درجہ حرارت والے چیمبرز میں رکھے جاتے ہیں جہاں وہ غیر معمولی شرح سے نشو و نما پاتے ہیں۔

مسٹر مالان کہتے ہیں کہ 'ہم نے انھیں اعشاریہ پانچ گرام وزن کی حالت میں یہاں رکھا اور پھر یہ چھ دنوں کے بعد (اجتماعی طور پر) 4 کلو وزن تک بڑھ گئے۔

مکھیوں کے مکمل طور پر بڑھنے کے بعد کنٹینرز کو ایک مشین میں خالی کر دیا جاتا ہے جو انھیں 'فراس' سے مؤثر طریقے سے اڑاتی ہے جو کہ ایک قسم کی نامیاتی کھاد کے طور پر فروخت کی جائے گی۔ مالان کا کہنا ہے کہ دواسازی کی صنعت کو بھنگ کے شعبے کی اس بائی پراڈکٹ میں کافی دلچسپی رہی ہے۔

اس مقام سے مکھیوں کے لاروا کو کئی طریقوں سے استعمال کیا جا سکتا ہے۔

بہت سے خشک ہو جاتے ہیں اور امریکہ میں پالتو مرغیوں کو کھلانے کے لیے برآمد کیے جاتے ہیں۔ باقیوں کو مؤثر طریقے سے کھردرا پاؤڈر بنا دیا جاتا ہے جسے ناروے کی ایک فرم کتوں کی غذا بنانے کے لیے استعمال کرتی ہے۔

دوسروں کو اب بھی ان کے تیل کے لیے پیسا جاتا ہے، یا مائع غذا میں تبدیل کرنے کے لیے ہائیڈرولائز کیا جاتا ہے۔

کمرے کے کونے میں سفید بوریوں کی قطاریں خشک لاروا سے منھ تک بھری ہوئی ہیں۔

انسان کے لیے یہ کیڑے زیادہ اچھا ذائقہ نہیں رکھتے، ان میں ایک ایسا ذائقہ محسوس ہوتا ہے جو خراب اور پرانے اناج میں محسوس ہوتا ہے۔ لیکن مالان کہتے ہیں کہ یہ ذائقہ بلیوں اور کتوں کے لیے بہت زبردست ہوتا ہے۔

زرعی کاروبار کی ڈچ تحقیقی تنظیم رابرو ریسرچ کے مطابق پالتو جانوروں کی خوراک کے لیے کیڑوں سے پروٹین کی عالمی پیداوار دہائی کے اختتام تک پانچ لاکھ ٹن تک پہنچ سکتی ہے جو کہ آج بمشکل 10 ہزار ٹن ہے۔ اور یہ ایک ایسی صنعت ہے جو تیزی سے ترقی کر رہی ہے۔

شہر کے ووڈ سٹاک علاقے کی ایک لیبارٹری میں فارم کے سائنسدان مسلسل لاروا کی مصنوعات کے ذائقے اور ان کے طبی فوائدکو بہتر بنانے کے لیے کوشاں ہیں۔

اس کا انحصار لاروا کو دی جانے والی خوراک، وہ حالات جن میں وہ نشو و نما پاتے ہیں اور یہ بھی کہ یہ مصنوعات حتمی طور پر کس طرح تیار کی جاتی ہے، ان سب پر ہوگا۔

ڈاکٹر لیہ بیسا، جو پی ایچ ڈی کے ساتھ فوڈ سائنسدان ہیں، وہ مکھیوں کے لاروا کو انسانی استعمال کے لیے گوشت کے متبادل کے طور پر استعمال کرنے کی حامی ہیں۔ وہ کہتی ہیں کہ 'اس (مکھیوں کا لاروا) کا دراصل کئی طرح سے استعمال کیا جا سکتا ہے۔‘

’اس کے کئی قسم کے استعمال کے حوالے سے سمجھا جا سکتا ہے۔‘

تازہ ترین مصنوعات جس پر ڈاکٹر بیسا کام کر رہی ہے وہ ایسی چیز ہے جسے پالتو جانوروں کے کھانے میں شامل کیا گیا ہے تاکہ ان کے ذائقہ اور غذائیت کے فوائد کو بہتر بنایا جا سکے۔

مالٹنٹو فارم میں شامل ہونے سے پہلے وہ ایک کمپنی شروع کرنے کے بعد جنوبی افریقہ کے میڈیا میں شہ سرخیوں کا حصہ بنی تھیں جب کیڑوں پر مبنی آئس کریم کی فروخت کی خبریں شائع ہوئی تھیں۔

سنہ 2013 کی ایک رپورٹ میں اقوام متحدہ کی فوڈ اینڈ ایگریکلچر آرگنائزیشن نے کہا کہ کیڑے کھانے سے دنیا بھر میں خوراک کی کمی کو دور کرنے میں مدد مل سکتی ہے۔ تاہم باوجود اس کے کہ کئی ممالک کیڑوں سے بنے ناشتے کو مقبول غذا کے طور پر تناول کرتے ہیں، مگر مغربی اقوام ان کیڑوں کو اپنی غذا کا حصہ بنانے کے لیے تیار نہیں ہیں۔

ڈاکٹر بیسا کا خیال ہے کہ فی الحال کیڑوں کا بڑے پیمانے پر استعمال زیادہ تر پالتو جانوروں تک محدود رہنے کا امکان زیادہ ہے۔

وہ کہتی ہیں کہ 'ہم ابھی اس مقام تک نہیں پہنچے ہیں۔' یہ کہنے کے بعد وہ محتاط انداز سے مزید کہتی ہیں کہ 'اس وقت انسانوں کے مقابلے میں کتوں کو کیڑوں سے بنی غذا کھلانا کافی آسان ہے۔'

فوٹوگرافی: ٹومی ٹرینچرڈ

مزید خبریں

Disclaimer: Urduwire.com is only the source of Urdu Meta News (type of Google News) and display news on “as it is” based from leading Urdu news web based sources. If you are a general user or webmaster, and want to know how it works? Read More