انڈیا: پاکستانی ٹیم کی جیت پر خوشی کا اظہار کرنے والی سکول ٹیچر برطرف

اردو نیوز  |  Oct 27, 2021

انڈیا کی ریاست راجھستان کے ایک نجی سکول کی استاد کو انڈیا کے خلاف پاکستانی کرکٹ ٹیم کی فتح پر خوشی کا اظہار کرنے پر نوکری سے نکال دیا گیا۔

انڈین اخبار انڈیا ٹوڈے کے مطابق نفیسہ عطاری نامی ٹیچر اودھ پور میں نیرج مودی سکول میں پڑھاتی تھیں۔ انہوں نے ٹی 20 ورلڈ کپ کے میچ میں انڈیا کے خلاف پاکستان کی جیت کے بعد اپنے واٹس ایپ سٹیٹس پر خوشی کا اظہار کیا تھا۔

نفیسہ نے اپنے واٹس ایپ سٹیٹس پر پاکستانی کھلاڑیوں کی تصاویر لگا کر لکھا تھا ’ہم جیت گئے۔‘

جب طلبہ میں سے ایک کے والدین نے ان سے پوچھا کہ کیا انہوں نے پاکستان کی حمایت کی ہے تو ان کا جواب تھا ’جی ہاں۔‘

جب نفیسہ عطاری کے واٹس ایپ سٹیٹس کی سکرین شاٹ وائرل ہوئے تو سکول کی انتظامیہ نے انہیں نوکری سے برخاست کر دیا۔

واضح رہے کہ ٹی 20 ورلڈ کپ میچ میں پاکستانی ٹیم کی فتح کے بعد انڈین سوشل میڈیا پر انڈیا کے مسلمان کھلاڑی محمد شامی کے خلاف نفرت آمیز ٹرینڈز چلائے گئے اور انڈیا کی مختلف یونیورسٹیوں میں زیر تعلیم کشمیری طلبہ کو تشدد کا نشانہ بنایا گیا۔

مزید خبریں

Disclaimer: Urduwire.com is only the source of Urdu Meta News (type of Google News) and display news on “as it is” based from leading Urdu news web based sources. If you are a general user or webmaster, and want to know how it works? Read More