ہم ایوراڈز: کینیڈا میں ایوارڈز کی تقریب منعقد کرنے پر صارفین کی تنقید، چینل انتظامیہ کی وضاحت

بی بی سی اردو  |  Sep 23, 2022

’ہماری پاکستانی مشہور شخصیات ’ہم ایوراڈز‘ میں شرکت کے لیے ٹورنٹو گئی ہیں جبکہ انجلینا جولی، مفتی مینک، ترک اداکار جلال جیسے فنکار سیلاب متاثرین کے لیے پاکستان میں ہیں، یہ سب بہت تکلیف دہ ہے۔۔۔۔ اس وقت ساری دنیا کینیڈا سمیت پاکستانی سیلاب متاثرین کے لیے امداد بھیج رہی ہے، ایسے وقت پر اس ایوارڈ فنکشن پر لاکھوں روپے خرچ کر کے جشن منانے کی بجائے یہی رقم سیلاب متاثرین کی مدد کے کام آ سکتی ہے۔ اس دکھ اور مصیبت یہ سب مناسب نہیں۔‘

یہ تبصرے سوشل میڈیا پر پاکستانی فنکاروں پر کی جانے والی تنقید کے چند نمونے ہیں۔

دراصل معاملہ یہ ہے کہ پاکستان کے نجی ٹیلی ویژن چینل ’ہم نیٹ ورک‘ کی جانب سے رواں برس کے ایورڈز کی تقریب کینیڈا کے شہر ٹورنٹو میں 24 ستمبر کو منعقد ہو رہی ہے جس کے لیے بیشتر پاکستانی فنکار کینیڈا پہنچے ہیں۔

ہم ایورڈز میں شرکت کے لیے کینیڈا جانے والے پاکستانی فنکاروں کی جہاز میں سفر کی تصاویر، ریہرسل کی ویڈیوز اور ان کے وہاں گھومنے پھرنے کی انسٹا سٹویرز سوشل میڈیا پر وائرل ہیں اور پاکستان میں سوشل میڈیا صارفین کا کہنا ہے کہ ان حالات میں ہم ٹی وی نے تقریب منسوخ نہ کر کے ’بے حسی‘ کا مظاہرہ کیا ہے۔

یاد رہے کہ اقوام متحدہ کے ادارہ برائے پناہ گزین (یو این ایچ سی آر) کی نمائندہ خصوصی انجلینا جولی نے رواں ہفتے سندھ میں سیلاب سے متاثرہ ضلع دادو میں تین دیہات کا دورہ کیا۔ تاہم سوشل میڈیا صارفین کی رائے کے برعکس ان کا یہ دورہ بطور اداکارہ یا مشہور بالی وڈ شخصیت کے نہیں بلکہ بطور نمائندہ خصوصی اقوام متحدہ تھا۔

مگر چونکہ پاکستان میں بیشتر لوگوں کا ان سے تعارف بطور اداکارہ ہے اس لیے وہ انجلینا جولی کی پاکستان آمد کو پاکستانی فنکاروں کی کینیڈا روانگی کے تناظر میں دیکھ رہے ہیں۔

دوسری جانب ہم نیٹ ورک کا اس تنقید پر کہنا ہے کہ وہ ’ہم ایوارڈز کینیڈا‘ کے پلیٹ فارم کو سیلاب متاثرین کے لیے فنڈز اکٹھا کرنے کے لیے استعمال کر رہا ہے‘ اور ٹکٹوں سے حاصل ہونے والی آمدن کا بڑا حصہ سیلاب متاثرین کی فلاح کے لیے دیا جائے گا۔

پاکستان پیپلز پارٹی سے وابستہ شرمیلا فاروقی نے انجلینا جولی کے دورہِ پاکستان کی تصاویر کا موازنہ پاکستانی فنکاروں کی کینیڈا میں تصاویر سے کرتے ہوئے تنقید کی کہ ہمارے پاکستان کی مشہور شخصیات ہم ایوراڈز میں شرکت کے لیے ٹورنٹو گئی ہیں جبکہ انجلینا جولی ہمارے سیلاب سے متاثرہ لوگوں کی حمایت اور مدد کے لیے ضلع دادو میں ہیں۔

https://twitter.com/sharmilafaruqi/status/1572911324778184705?s=20&t=bjaBeDoSWYBWjH4UVXBNxw

ساجد خان نے لکھا کہ ’ہماری نام نہاد مشہور شخصیات کو اس چیز کا کوئی احساس نہیں کہ پاکستان میں کیا ہو رہا ہے۔ چند سال پہلے ان میں سے کسی نے بھی انتخابات میں ووٹ نہیں دیا کیونکہ وہ کینیڈا میں ایوارڈز میں شرکت کر رہے تھے۔ اس بار، آدھا ملک سیلاب میں ڈوب گیا ہے اور انھوں نے پھر ہم ٹی وی ایوارڈز میں جانے کا انتخاب کیا۔‘

یہ بھی پڑھیے

’گرمی شدید تھی اور وقت کم مگر انجلینا بار بار خواتین سے بات کرنے رک جاتی تھیں‘

بلوچستان کا وہ علاقہ جہاں ایک ماہ بعد اونٹوں پر راشن پہنچایا گیا

’میں نے سیلاب کے پانی میں سے 15 لاشیں نکالیں‘

زوئی خان لکھتی ہیں کہ یہ سوچنا کہ ہم ایوارڈز میں ایک رات کی تفریح ​​کے سپانسرزنے حقیقت میں پاکستان میں سیلاب زدگان کی جانیں بچانے کے بجائے چندہ دینے پر غور کیا ہو گا، شاید بہت زیادہ مانگنے کے مترادف ہو گا۔ یہ بھینس کے آگے بین بجانے جیسا نہیں تو اور کیا ہے۔

https://twitter.com/zoekhan/status/1572926635166388224?s=20&t=8rzdP8CI8BmuYheuUM9pJA

فنکاروں کے ساتھ ساتھ ہم ٹی کی انتطامیہ بھی تنقید کی زد میں ہے اور کئی صارفین اُن سے پوچھتے نظر آتے ہیں کہ آپ نے پاکستان کے حالات کو دیکھتے ہوئے یہ تقریب ملتوی کیوں نہیں کر دی۔

عائشہ سعید نامی صارف پوچھتی ہیں کہ ’کیا ہم ٹی وی کو معلوم ہے کہ پاکستان سیلاب کے بعد بدترین حالات کا سامنا کر رہا ہے؟ کیا وہ جانتے ہیں کہ ملک معاشی بدحالی کا شکار ہے، لوگ بھوک اور غربت کی وجہ سے مر رہے ہیں؟ جب بھی ان کے ہم ایورڈز کے لیے کینیڈا آنے والا اشتہار آتا ہے تو مجھے بے چینی ہونے لگتی ہے۔ یہ ہماری مشہور شخصیات کس دنیا میں رہتی ہیں؟‘

چند صارفین اُن کے چینل سے نشر ہونے والے ڈراموں سمیت تمام مواد کے بائیکاٹ کی مہم بھی چلا رہے ہیں۔

ہم ٹی وی کا مؤقف

سوشل میڈیا پر ہونے والی تنقید کے جواب میں ہم ٹی وی کی انتظامیہ کا کہنا ہے کہ جیسا کہ پہلے اعلان کیا گیا تھا، ہم نیٹ ورک ’ہم ایوارڈز کینیڈا‘ کے پلیٹ فارم کو سیلاب متاثرین کے لیے فنڈز اکٹھا کرنے کے لیے استعمال کر رہا ہے۔‘

نیٹ ورک کا کہنا ہے کہ ٹکٹوں کی فروخت سے ہونے والی آمدنی کے ایک حصے کے علاوہ، ہم 22 ستمبر 2022 کو ایوارڈز کے لیے سفر کرنے والے فنکاروں، مومنہ اینڈ دورید فاؤنڈیشن اور آئی ڈی آر ایف کے تعاون سے ’فنڈ ریزنگ گالا‘ کا اہتمام کر رہے ہیں۔ گالا نائٹ سے حاصل ہونے والی تمام آمدنی بشمول ٹکٹوں کی فروخت اور ڈیزائنرز ملبوسات کی نیلامی اور سابق اور موجودہ پاکستانی کرکٹ کھلاڑیوں کے دستخط شدہ کرکٹ بلے اور بالز سیلاب کی امداد اور بحالی کی کوششوں میں دی جائیں گے۔‘

سوشل میڈیا پر ہونے والی تنقید کے بعد ہم ٹی وی کے علاوہ کئی فنکاروں کا مؤقف بھی سامنے آیا ہے۔

اداکارہ اشنیٰ شاہنےاپنی انسٹا سٹوریز اور ٹویٹر پر لکھا کہ ’ہم سب لوگ جو ایورڈز کے لیے کینیڈا آئے ہیں، اُن پر تنقید پریشان کُن ہے۔‘

اُن کا کہنا تھا کہ ضروری ہے سیلاب متاثرین یہ نہ سمجھیں کہ ہم انھیں بھول گئے اور اس حوالے سے میں اور میرے ساتھی فنکار ان کے لیے عطیات جمع کرنے کی کوششیں کر رہے ہیں۔

https://twitter.com/ushnashah/status/1573127246147092480?s=20&t=1QKnGhZJpSNytqhi1fhZAw

اس کے چند گھنٹے بعد اشنیٰ شاہ نے بتایا کہ لوگوں نے رات کے کھانے کے ٹکٹ کے لیے 1500 ڈالر تک کے ٹکٹ خریدے، نیلامی میں اشیا ہزاروں ڈالر میں فروخت ہوئیں۔ تمام فنڈز سیلاب کی امداد کے لیے دیا جا رہا ہے اور اسی لیے ہم یہاں آئے ہیں۔

انھوں نے مزید لکھا ’شکریہ کینیڈا! آپ نے انتہائی فیاضی کا مظاہرہ کیا۔‘

مزید خبریں

Disclaimer: Urduwire.com is only the source of Urdu Meta News (type of Google News) and display news on “as it is” based from leading Urdu news web based sources. If you are a general user or webmaster, and want to know how it works? Read More