بلائنڈ ٹی20 ورلڈ کپ: انڈیا کا پاکستانی ٹیم کو ویزہ دینے سے انکار 

اردو نیوز  |  Dec 07, 2022

انڈیا کی وزارت خارجہ نے پاکستان بلائنڈ کرکٹ ٹیم کو ویزے کے لیے این او سی جاری کرنے سے معذرت کر لی ہے جس کے باعث بلائنڈ ٹی20 کرکٹ میں پاکستان کی نمبر ون ٹیم ایونٹ میں شرکت نہیں کر سکے گی۔ 

پاکستان بلائنڈ کرکٹ ایوسی ایشن کے چیئرمین سلطان شاہ نے اردو نیوز کو بتایا کہ ’انڈیا کی وزارت خارجہ نے سیاسی بنیاد پر پاکستان ٹیم کو ویزے کے لیے این او سی جاری کرنے سے معذرت کی ہے۔‘

سلطان شاہ کے مطابق ’پاکستان شیڈولڈ بلائنڈ ٹی20 ورلڈکپ میں شرکت کے لیے ویزوں کا انتظار کر رہا تھا تاہم وزارت خارجہ کی جان سے معذرت کے بعد اب ٹیم پاکستان ایونٹ میں شرکت نہیں کر پائے گی۔‘

خیال رہے کہ پاکستان کی ٹیم ٹی20 ورلڈ کپ میں رنر اپ رہ چکی ہے اور اس کا شمار نمبر ون ٹیموں میں ہوتا ہے۔

سلطان شاہ نے مزید کہا کہ انڈیا کے اس رویے کے خلاف عالمی سطح پر شدید احتجاج ریکارڈ کیا جائے گا اور آئندہ انڈیا کو کسی بھی عالمی کپ کی میزبانی نہ دینے کی درخواست کریں گے۔ 

انہوں نے بتایا کہ انڈیا کی طرف سے تمام ٹیموں کو ویزے دینے کی یقین دہانی پر ہی تیسرے بلائنڈ ٹی20 ورلڈ کپ کی میزبانی دی گئی تھی۔

خیال رہے کہ تیسرا بلائنڈ ٹی20 ورلڈ کپ 6 دسمبر سے انڈیا کے شہر فرید آباد میں شروع ہو رہا ہے۔ 

ایونٹ میں میزبان انڈیا سمیت 7 ٹیموں نے شرکت کرنا تھی جس میں آسٹریلیا، جنوبی افریقہ، سری لنکا، بنگلہ دیش، نیپال اور پاکستان شامل ہیں۔

پاکستان کی عدم شرکت کے بعد اب ایونٹ 6 ٹیموں کے درمیان کھیلا جائے گا۔ 

پاکستان اور انڈیا کے درمیان 7 دسمبر کو میچ شیڈول تھا۔ عالمی شہرت یافتہ آل راؤنڈر یوراج سنگھ ایونٹ کے برینڈ ایمبیسڈر ہیں۔

مزید خبریں

Disclaimer: Urduwire.com is only the source of Urdu Meta News (type of Google News) and display news on “as it is” based from leading Urdu news web based sources. If you are a general user or webmaster, and want to know how it works? Read More