پاکستان میں رمضان کی آمد کے ساتھ ہی مہنگائی کا جن آزاد ہوجاتا ہے، پھلوں کے ساتھ ساتھ سبزی، گوشت، مرغی، دودھ، بیکری کی اشیاء یہاں تک کہ کھجور بھی ڈبل قیمت تک پہنچ جاتی ہے تاہم پاکستان میں ایسے لوگ بھی ہیں جو رمضان کی آمد پر اپنی مدد آپ کے تحت لوگوں کی مدد کیلئے اشیاء کی قیمتیں کم کردیتے ہیں۔
پاکستان میں عام طور پر رمضان سےپہلے 50 روپے میں دو درجن ملنے والا گلا سڑا کیلا رمضان میں 200 روپے درجن تک پہنچ جاتا ہے۔ سیب، خربوزہ، امرود، آڑو، فالسہ، چیکو اور تربور بھی روزہ داروں کا منہ چڑاتے ہیں کیونکہ دکانداروں کو معلوم ہے کہ آپ کو ہر حال میں اپنے اہل خانہ کیلئے اہتمام کرنا ہے تو دکاندار پہلے سے آپ کی جیب کاٹنے کیلئے تیار ہوتا ہے۔
رمضان میں بیروزگار بھی سڑکوں پر پکوڑے اور دو نمبر کولڈ ڈرنک کے اسٹال لگا لیتے ہیں جنہیں پی کر آپ کو سکون ملے نہ ملے آپ کے پیٹ میں مروڑ ضرور اٹھتے ہیں۔ رمضان میں پھلوں کے ساتھ ساتھ سبزی، گوشت، مرغی، دودھ، بیکری کی اشیاء یہاں تک کی کھجور بھی ڈبل قیمت تک پہنچ جاتی ہے۔
سوشل میڈیا پر وائرل پوسٹ کے مطابق کراچی کے علاقے اورنگی ٹاؤن میں لوگوں کو رمضان میں ریلیف دینے کیلئے ایک دکان پر یکم رمضان المبارک سے دودھ 50 روپے لیٹر اور دہی 80 روپے کلو فروخت کرنے کیلئے اشتہار آویزاں کردیا گیا ہے جو ہر مسلمان دکاندار کیلئے ایک روشن مثال ہے۔