کھیل کے میدان میں کھلاڑیوں سے محبت کا اظہار تو اکثر دیکھنے میں آتا ہے اور آج کے دور میں اپنے پسندیدہ کھلاڑیوں کے ساتھ سیلفی بنانا عام سی بات ہے لیکن یو ایس اوپن ٹینس ٹورنامنٹ میں ایک دلچسپ واقعہ پیش آیا جہاں خاتون ٹینس کھلاڑی نے سیلفی کی اجازت مانگنے والے مداح سے منگنی کرلی۔
29 سالہ گیبرین موگوروزا سے نیویارک میں ہونیوالے یو ایس اوپن کے دوران ایک مداح نے سیلفی کی اجازت مانگی تھی جس پر گیبرین کو بھی آرتھر پسند آگئے ۔2016 میں فرنچ اوپن اور 2017 میں ومبلڈن ٹائٹل جیتنے والی گیبرین موگوروزا نے آرتھر بورجیس کے ساتھ منگنی کی تصدیق کردی ہے۔
وینزویلا میں پیدا ہونے والی ہسپانوی اسٹار گیبرین موگوروزا خواتین کی رینکنگ میں عالمی نمبر ون پوزیشن پر رہنے کے علاوہ دو اولمپک گیمز، ریو 2016 اور ٹوکیو 2020 کے ساتھ ساتھ 2015 سے فیڈ کپ میں اسپین کی نمائندگی کرچکی ہیں۔
گیبرین موگوروزا نے جون 2017 میں اپنا پہلا ومبلڈن ویمنز سنگلز کا ٹائٹل جیتنے سے قبل بتایا تھا کہ وہ بین الاقوامی تعلیمی این جی او روم ٹو ریڈ کی سفیر بن گئی ہیں جبکہ لڑکیوں کے لیے ثانوی تعلیم تک مساوی رسائی میں بھی معاونت کرتی ہیں۔