رابرٹ پریوسٹ کیتھولک مسیحیوں کے نئے پوپ منتخب٬ یہ انتخاب کیسے ہوتا ہے؟

امریکہ سے تعلق رکھنے والے رابرٹ پریوسٹ کیتھولک مسیحیوں کے نئے پوپ منتخب ہوگئے ہیں اور یہ پہلے پوپ ہیں جن کا تعلق امریکہ سے ہے-

تفصیلات کے مطابق 69 سالہ رابرٹ پریوسٹ کو پوپ فرانسس کا جانشین مقرر کردیا گیا ہے، نئے پوپ رابرٹ پریوسٹ نہ صرف پہلے امریکی پوپ ہیں بلکہ مسیحوں حلقوں میں وہ اپنی شائستگی اور نرم مزاجی کے لیے بھی جانے جاتے ہیں۔

اس سے قبل بدھ کو کیتھولک مسیحیوں کے نئے روحانی پیشوا کا انتخاب نہیں ہو سکا تھا، تاہم جمعرات کو ویٹی کن میں سسٹین چیپل سے سفید دھوان نکلا جس کے بعد وہاں موجود عقیدت مندوں میں خوشی کی لہر دوڑ گئی۔

چونکہ بدھ کی شام سسٹین چیپل کی چمنی سے کالا دھواں نکلتا دکھائی دیا تھا اس لیے پوپ کا انتخاب نہ ہو سکا، کالا دھواں نکلنا روایتی طور پر اس بات کی علامت تھی کہ کیتھولک مسیحیوں کے روحانی پیشوا کا انتخاب نہیں ہوسکا ہے۔

پوپ کے انتخاب کے لیے کارڈینلز کی پہلی ووٹنگ ناکام رہی تھی، تاہم اس کے بعد دوسرے مرحلے میں پوپ رابرٹ کو منتخب کیا گیا۔

خیال رہے کہ نئے روحانی پیشوا کے لیے ’جَلسہٴ انتخابِ پوپ‘ شروع ہوا تھا، جس میں 70 ممالک سے 80 سال سے کم عمر کے 133 کارڈینلز شریک ہوئے تھے۔