سعودی پرو لیگ کا برازیل میں فٹبال روابط مزید بڑھانے کی مہم کا آغاز

سعودی پرو لیگ نے برازیل میں اپنی موجودگی مضبوط کرنے کے لیے سٹریٹجک توسیعی مہم کا آغاز کیا ہے جس کا مقصد  فٹبال کے مداحوں کے ساتھ روابط اور تعلقات مزید مستحکم کرنا ہے۔

عرب نیوز کے مطابق اس وقت سعودی پرو لیگ میں 26 برازیلین کھلاڑی کھیل رہے ہیں جو کسی بھی دوسرے ملک کے فٹ بالرز سے زیادہ ہیں۔

برازیل میں یوٹیوب چینل Canal GOAT اور Band کے ذریعے 100 سے زائد فٹبال میچز نشر کیے گئے جس سے لیگ کو 2024-2023  کے دوران پانچ کروڑ ویوز حاصل ہوئے۔

اس کامیابی کے تحت برازیلین شائقین کے ساتھ روابط مزید بہتر کرنے، پرو لیگ کی مقبولیت بڑھانے اور نئے تجارتی مواقع پیدا کرنے کی کوشش کی جا رہی ہے۔

سعودی پرو لیگ کے عہدیداران اس وقت برازیل میں موجود ہیں جہاں وہ برازیلین لیگ، برازیلین فٹبال کنفیڈریشن اور معروف سپورٹس مارکیٹنگ ایجنسیوں کے نمائندوں سے ملاقاتیں کر رہے ہیں۔

سعودی پرو لیگ کے جنرل مینیجر برائے مارکیٹنگ اینڈ کمیونیکیشن محمد بسراوی نے بتایا ہے ’برازیلین عوام کے فٹبال سے گہرا اور جذباتی تعلق کے باعث ہم انہیں مزید قریب  لانے کے لیے برازیل میں طویل مدت تک اپنی موجودگی قائم رکھنا چاہتے ہیں۔

برازیل میں یوٹیوب چینلز کے ذریعے 100 سے زائد فٹبال میچز نشر کیے گئے (فائل فوٹو: عرب نیوز) سعودی پرو لیگ  نے برازیل میں باضابطہ سوشل میڈیا چینلز متعارف کرانے کا فیصلہ کیا ہے جس کے بعد شائقین کو مقامی زبان میں میچوں کی کمنٹری، تبصرے اور خصوصی انٹرویوز سننے کے مواقع میسر آئیں گے۔

اس کے علاوہ فٹبال کے مقامی پرستاروں  کے ساتھ تعاون بڑھایا جائے گا جس سے برازیلی مداحوں کے ساتھ تعلقات مزید مضبوط ہوں گے۔

SPL کی مقبولیت اور تجارتی مواقع بڑھانے کی کوشش کی جا رہی ہے (فائل فوٹو: گیٹی امیجز)برازیل میں سعودی پرو لیگ کی موجودگی کو اہم فٹبال ٹورنامنٹس تک وسعت دی جائے گی جس سے فٹبال کیلنڈر ایئر میں مؤثر شراکت داری قائم ہو گی۔

سعودی پرو لیگ برازیل میں سرمایہ کاری کے ذریعے فٹبال کی دنیا میں اپنی حیثیت مزید مستحکم بنانے کے ساتھ برازیل میں فٹبال کے مداحوں کے ساتھ لیگ کے بین الاقوامی سفر میں نئے اور دلچسپ باب کا اضافہ کر رہا ہے۔