رومن کیتھولک چرچ کے پہلے لاطینی امریکی پیشوا پوپ فرانسس کی عظیم الشّان آخری رسومات سنیچر کی صبح شروع ہو گئی ہیں جن میں عالمی رہنما بھی شریک ہیں۔فرانسیسی خبر رساں ایجنسی اے ایف پی کے مطابق کچھ دیر کی سوگوار خاموشی کے بعد جیسے ہی ہجوم پُروقار انداز میں پوپ فرانسس کے تابوت کو لے کر نکلا تو سینٹ پیٹرز سکوائر تالیوں سے گونج اُٹھا۔
ویٹیکن کے مطابق سنیچر کو پوپ فرانسس کی آخری رسومات میں تقریباً دو لاکھ افراد نے شرکت کی۔
جب آخری رسومات میں شریک معزز شخصیات نے پوپ کے تابوت کے سامنے دعائیہ کلمات کے بعد اپنی نشستیں سنبھالیں توسینٹ پیٹرز باسیلیکا کی گھنٹیاں بجنے لگیں۔ امریکی صدر ڈونلڈ ٹرمپ اپنی اہلیہ میلانیا کے ساتھ پوپ فرانسس کی آخری رسومات میں شرکت کے لیے سنیچر کو ویٹی کن پہنچے اور پوپ فرانسس کو خراجِ عقیدت پیش کیا۔اطالوی کارڈینل جیوانی بٹیسٹا ری نے کہا کہ ’پوپ فرانسس سمجھتے تھے کہ چرچ سب کے لیے ایک گھر ہے، ایک گھر جس کے دروازے ہمیشہ کُھلے ہیں، ایک چرچ جو ہر شخص کے سامنے جُھکنے کی صلاحیت رکھتا ہے خواہ اس کے عقائد کچھ بھی ہوں اور ان کے زخموں کو مندمل کر سکتا ہے۔‘انہوں نے کہا کہ ’پوپ فرانسس نے دنیا بھر میں تنازعات کو ختم کرنے کی کوششوں میں ایماندارانہ مذاکرات پر زور دیا۔ حالیہ برسوں کی شدید جنگوں، ان کی غیر انسانی ہولناکیوں اور اَن گنت اموات اور تباہی کے ساتھ، پوپ فرانسس نے اپنی آواز بلند کرتے ہوئے امن کی درخواست کی اور ممکنہ حل تلاش کرنے کے لیے معقول اور ایماندارانہ بات چیت کا مطالبہ کیا۔‘کیتھولک مسیحیوں کے پیشوا پوپ فرانسس 21 اپریل کو 88 برس کی عمر میں انتقال کر گئے تھے (فوٹو: روئٹرز)پوپ فرانسس نے ویٹیکن سٹی میں دفن نہ ہونے کا انتخاب کر کے ایک صدی سے زیادہ عرصے سے جاری روایت توڑنے کا فیصلہ کیا تھا۔ انھیں باسیلیکا کے سینٹ میری میجر میں سپرد خاک کیا جائے گا جسے اٹلی میں سانتا ماریا میگیور کے نام سے جانا جاتا ہے۔شاہ عبداللہ دوم اور ملکہ رانیہ ال عبداللہ بھی آج ویٹیکن سٹی کے سینٹ پیٹرز سکوائر پر پوپ فرانسس کی آخری رسومات میں شرکت کریں گے۔21 اپریل کو ویٹی کن سٹی نے ایک اعلامیے میں کہا تھا کہ کیتھولک مسیحیوں کے پیشوا پوپ فرانسس 88 برس کی عمر میں انتقال کر گئے۔ شدید بیماری کے باعث 38 دن تک ہسپتال میں زیرِ علاج تھے۔ 23 مارچ کو صحت یاب ہونے کے بعد ان کو ہسپتال سے ڈسچارج کیا گیا تھا۔
وہ رومن کیتھولک چرچ کے پہلے لاطینی مذہبی رہنما تھے اور 2013 میں رومن کیتھولک چرچ کے سربراہ بنے تھے۔
پوپ فرانس کا تعلق ارجنٹینا سے تھا، اور ان کا نام خورخے ماریو برگو لیو تھا۔