ڈائریکٹر جنرل پنجاب ڈیزاسٹر مینجمنٹ اتھارٹی عرفان علی کاٹھیا کا کہنا ہے کہ پنجاب میں مون سون کا سیزن آج سے باضابطہ طور پر ختم ہو گیا ہے اور آئندہ ہفتے مزید بارشوں کا کوئی امکان نہیں ہے۔
لاہور میں پریس کانفرنس کرتے ہوئے ڈی جی پی ڈی ایم اے نے کہا کہ مون سون سیزن کے اختتام کے بعد صوبے کے سیلاب زدہ علاقوں سے پانی نکلنا شروع ہو گیا ہے اور پانی کی سطح کم ہو رہی ہے۔
انہوں نے بتایا کہ پنجاب میں مرالہ سے پنجند تک پانی کا بہاؤ معمول کے مطابق ہے اور کسی مقام پر بند توڑنے کی ضرورت پیش نہیں آئی۔ سیلابی صورتحال کے دوران تمام اداروں نے کام کیا اور اب تک 28 اضلاع کے 4 ہزار 755 دیہات متاثر ہوئے جن میں سب سے زیادہ متاثرہ علاقے علی پور، ملتان اور جلال پور تھے۔
ڈی جی پی ڈی ایم اے کے مطابق سیلاب کی وجہ سے 24 لاکھ 82 ہزار ایکڑ زرعی رقبہ زیر آب آیا جس میں چاول کی فصل 15 فیصد اور گنے کی فصل 22 فیصد متاثر ہوئی۔ محکمہ زراعت نے مویشیوں کو چارہ فراہم کرنے اور لائیو اسٹاک کو بچانے میں اہم کردار ادا کیا۔
انہوں نے مزید بتایا کہ متاثرین کے لیے 425 میڈیکل کیمپس قائم کیے گئے جہاں طبی امداد فراہم کی گئی۔